Сахалыы тыллаах КВН эйгэтэ кэҥиир, таһыма үрдүүр. Ол хамаанда ахсаана эрэ элбиллэриттэн буолбакка, дьиҥ күүстээх хамаандалар баар буолбуттарыттан, саҥаттан-саҥа истиил үөскүүрүттэн, шутка ис хоһооно сытыырҕайарыттан, дьон сэҥээрэр буолбутуттан тутулуктаах. Умайа сылдьар КВНщиктар баар буолан араас бырайыактар, былааннар үөскүүллэр, холобур, быйылгы сылтан биһиги КВНмыт НВК «Саха» каналыгар туспа биэриилэннэ, илин эҥэргэ уонна бүлүү умнас улуустарыгар филиаллары арыйда, маастарыстыбаны үрдэтэр кыһыҥҥы оскуолаланна. Бу саас DVD пособие тахсара, эбии үөрэхтээһин программата олоххо киирэрэ күүтүллэр.
Быйылгы ыччат оонньууларыгар ким чорбойуой? Эмиэ Сунтаар улууһун «Дьикти саас» хамаандата дуо? Сунтаар хамаандата киһи санаан кэлэ-кэлэ күлэр чаҕылхай миниатюрата суох эрээри, хас биирдии шуткатыттан киһи күлэр. Ол аата көрөөччүгэ «бэрэбиэркэлэммит» программалаах, быһаччытын эттэххэ бэлэмнэниигэ болҕомтону уонна бириэмэни балайда уурбут. Өссө киһи кэрэхсиир өрүтэ – бэрээдэктээх, тиһэҕэр тиэрдиллэр хартыыналардаах, хас биирдии шутка ханнык баҕарар көрөөччүгэ тиийэр гына чочуллубут. Дьиҥэ, биһиги дьоммут бары «кыра» бириэмэни уураллара буоллар бу таһымҥа тиийиэ этилэр. Бу дьоҥҥо Дьокуускай куорат «Күн тахсыыта» КВН хамаандата күүстээх утарсааччы буолар кыахтаах диэн көрөбүн. Уолаттар үһүө эрэ да буоллаллар – элбэхтик үлэлииллэр, онуоха оскуолатааҕы опыттара сыттаҕа дии… Ханныгын да иһин оскуола оҕолорун Лигатын икки төгүллээх кыайыылаахтара, Россия сайыҥҥы кубогын (оҕолорго) чемпионнара! Ол эрэн күүстээх икки эрэ хамаанда диэбэппин, полуфиналлар кэннэ хаартыына уларыйыа…
Буолуохтаах оонньууну бэйэм харахпынан быһа-ото тутан кэпсиирим табыгаһа суох, онон, күндү ааҕааччы, бэйэн илэ хараххынан кэлэн көрөрүн, финалга кимнээх киирэллэрин талар түҥҥэ кыттыһарын ордук буолуо!
Олунньу 11 күнүгэр – Дьокуускай куорат устудьуоннарыгар. Буолар сирэ: атыы-эргиэн уонна экономика колледжа, саҕаланар: киэһэ 5 ч.
Олунньу 18 күнүгэр – илин эҥэр уонна киин улуустар Нам сэлиэнньэтигэр мустуохтара, саҕаланар: киэһэ 5 ч.
Уонна олунньу 25 күнүгэр – бүлүү умнас улуустара күөн көрсүөхтэрэ. Буолар сирэ: Сунтаар сэлиэнньэтэ, саҕаланар 5 ч.
Саха Республикатын «Саха КВН Лигата»
ыччат общественнай тэрилтэтин
Президенэ Геннадий Охлопков