Георгий Михайлов, эрдэ Aartyk.ru суруйбутун курдук 1978 сыллаахха төрөөбүт. Төрдө - Сиэйэ, Сунтаар улууһа.

2001 сыллаахха Москватааҕы энергетика институтун Смоленскайдааҕы филиалын бүтэрбит. Идэтинэн инженер-технолог. Үөрэҕин бүтэрэн баран, 2001 сылтан 2004 сылга диэри, "Кристалл" алмааһы кырыылыыр кэтэх собуокка үлэлээбит. Онтон 2004 сыллаахха СР президенин уонна правительствотын дьаһалтатыгар 1-кы вице-премьер Геннадий Алексеев секретариатыгар старшай референынан үлэлээбит.  Георгий Николаевич оччолорго промышленность уонна геология боппуруоһугар эппиэтинэстээх киһинэн үлэлээбит.

2008 сыллаахха президент В.Штыров секретариатын салайааччытын солбуйааччытынан, онтон Штыров барарыгар секретариатын салайааччытын эбээһинэһин толорооччунан үлэлээбит.  Онтон правительство бэрэссэдээтэлин сүбэһитинэн анаммыт. Ол кэнниттэн Айсен Николаев (зампред эрдэҕинэ) секретариатын салайбыт. 

Кулун тутар 19-ттан Дьокуускай куорат дьаһалтатын аппараатын салайааччытынан ананна. 

Георгий Михайлов кэргэннээх, үс оҕолоох. Кэргэнэ билигин оҕотун көрөн дьиэтигэр олорор. 

Михайлов билиҥҥи дуоһунаһын сүрүн хайысхатын маннык этэр: "Бастатан туран, докумуоннар сүтүө суохтаахтар, барыта орун-оннугар баран иһиэхтээх. Ылыллыбыт дьаһал суһаллык, чопчу, сөпкө туоларын хонтуруоллуохтаахпыт".

Георгий Николаевич үрдүкү салалтаҕа 8 сыл үлэлээбит даҕаны, кинини сирэй билэр киһи аҕыйах. "Ол аата дьиҥнээх аппараатчик, бары улахан политиктарга уһуйуллубут киһи эбит" диэн сыана быһааччылар бааллар.