Мэҥэ Хаҥалас урукку баһылыга Владимир Птицын олунньу 21 күнүгэр Ил Түмэн уочараттаах  XXXII мунньаҕар Саха сирин Счетнай палататын аудиторынан анаммыта. Улуус кулубата дуоһунаһыттан барбытын кэннэ 6 ый иһигэр саҥа баһылыгы талар быыбар ананыахтаах. Дьон, Птицын барбыт кэмиттэн алта ыйы ааҕан лаһырҕатан, быыбар алтынньыга буолар диэн сабаҕалаабыттара хаалла. Бэл, түргэн-тарҕан быһаарыы кэнниттэн, биир бөдөҥ стратегическай суолталаах улуус, бу айылаах аан дойду таһымнаах тэрээһин буолаары турдаҕына, тимир суол, муоста тутуутун боппуруоһун быһаарыллыыта үтэн-анньан кэлбитигэр, баһылыга суох олороро табыллыбата чахчы, онон быыбар ыам ыйыгар ананна.

Владимир Птицын бэйэтин кэнниттэн баһылык буолуох кэриҥнээх киһини, солбуйааччытын - Николай Старостины хаалларбыт дииллэр. Старостин билигин "врио" самалыктаах улууһун салайан олорор. Николай Прокопьевич Старостин урут быыбарга кыттыбатах киһи. "Биир ньыгыл Арассыыйа" баартыйаттан барарым буолуо" диэн бэйэтэ этэр. Оччотугар Мэҥэ  "ньыгыллара" праймериз тэрийэр түбүккэ түһүөхтээхтэр. Былаас баартыйатын "политическай ытыктабыла" түһэ турар кэмигэр, баартыйаттан киирсии хайдах эбитэ буолла...

Быыбары кэтээн көрөөччүлэр этэллэринэн, бэйэтин тылын өссө !адмресурс" этэ илик. Сурах быһыытынан, урукку Тыа хаһаайыстыбатын миниистирэ, правительство бэрэссэдээтэлин солбуйааччыта, билигин өрөспүүбүлүкэ көтөр фабрикаларын түмэр соруктаах холдинг салайааччыта - Айаал Степановка, кэккэ табаарыстар "Мэҥэ баһылыгар киирис" диэн этиилээх тахса сылдьыбыттара иһиллэр. Айаал Иванович  президент этии киллэрэ илигинэ билиҥҥи дуоһунаһыттан барара сир саарбах. Стратегическай улууһу ким баһылыахтааҕын, арааһа, Аҕа баһылык бэйэтэ быһаарар буолуохтаах.  

Ол да буоллар, быыбарга кыттыахтаах дьон ахсаана күн-түүн эбиллэн иһэр.  Бүгүҥҥү күҥҥэ 5 киһи улуус баһылыгын дуоһунаһыгар  дураһыйар:

1. Николай СТАРОСТИН - баһылык эбээһинэһин толорооччу.

2. Родион ФЕДОРОВ - Урукку Эргиэн, аһынан-үөлүнэн хааччыйыы Госкомитетын салайааччыта.

3. Тимофей НЕСТЕРОВ - Майа нэһилигиэгин баһылыга.

4. Ньургун ПИНИГИН - бизнесмен.

5. Айаал СТЕПАНОВ - урукку вице-премьер.