Быраабыла быһыытынан, кандидаттар бэйэ-бэйэлэригэр ыйытыы биэрсэн мөккүөрдэрин саҕалаатылар.
Кырдьаҕааһап Федоровтан "Мыранград" хаһан тутуллуой, эн кыайдаххына чопчу бу бырайыаккын олоххор киллэрэргэрбиэс сыл иһигэр тугу оҥоруоххунуй диэн сураста. Киһитэ халыйан-халыйан, онон-манан эргитэн баран, хаста да боппуруоһу хатылааһын кэнниттэн: "Оҕолорбут, сиэннэрбит оҥоруохтара", - диэн "кэлэр көлүөнэҕэ" утопиятын бэрт улгумнук көлбөрүтэн кэбистэ.
Кырдьаҕааһап икки ыйытыыта предпримательство туһунан буолла. Эргиэмсик: "Ойуур фондатын (РФ бас билиитин) муниципалитет бас билиитигэр - тутуу ыытыллар сиригэр кубулутуохха наада. Онно 6 ый эрэ ирдэнэр" диэтэ... Боппуруос эмиэ хатыланна. Федоров эмиэ халыйан, туох баар быһаарыыны "фонтан ханна тутулларыттан саҕалаан тутуу ханнык сиргэ тутулларын быһаарарга референдум ыытан дьонтон ыйытан эрэ баран быһаарыы ылынар "норуот мээрэ" буолар баҕалааҕын эттэ. Мдаа... Ол референдум хаһан сокуонунан көҥүллэнэн, хаһан тэриллэн, кумааҕы бөҕөтө бэчээттэнэн, докумуон бөҕөтө толоруллан быһаарыллыар диэри, баар фонтан алдьаныыһык. хас боппуруос аайы рферендумнуу сырыттахха күн-дьыл баранар. Аны ол тэрээһин босхо оҥоһуллубута өйдөнөр.
Ыытааччы көмөтүнэн боппуруос хатыланна: "Дьоҕус предпринимательсвоны өйүүргэ тугу оҥоруоҥ этэй?"
Федоров предпринимателлэргэ сир атыылыыр үһү, ол сири эргиэмсик ылан баран хайаан да социальнай объект тутуохтаах үһү. "10 сыл эрэ кэнниттэн ол сир дьиҥнээхтик предприниматель баҕатынан туһанар усулуобуйата олохтонуохтаах" диир. 10 сылга туһаммат эрээри тоҕо мин сир ылан орускуоттанабын?! Дьоҕус предприниматель 10 сылы быһа тута сытар хаппытааллаах үһү дуо?
Эмиэ Федоровка ыйытыы: "Преступноһы-буруйу оҥорууну утары хайдах охсуһаҕын?" Дьиҥинэн, бу дьиикэй ыйытыы. Бэйэтэ дьону ытыалаан холуобунай дьыалаҕа эриллэ сылдьыбыт киһиэхэ итинник ыйытыыны биэрэр - суустааһыҥҥа холоонноох.
Кырдьаҕааһап тугу эппиэттээтэ? Сууһарар, сатаан хоруйдаабатын курдук боппуруос бэриллиэхтээҕэ этэ, дьиҥинэн. Ону Федоров Кырдьаҕааһаптан ыйытар: "Хаста, ханнык боппуруоска Гордумаҕа выступайдаабыккыный?" диэн. Кырдьаҕааһап үөрэ-көтө "тохтоо" диэхтэригэр диэри эппиэттээтэ. Аһара баран, куоракка республика 18 бырыһыан оҕото үөрэнэр, ол гынан баран бюджеттан куоракка 4 бырыһыан эрэ үп үөрэх, оҕо кыһалҕатыгар көрүллэр диэтэ.
Чэ, ситигирдик хабааннаах мөккүөр буолла.
Тиһэҕэр тиийэн, кандидаттар чаһыларын атастастылар. Кулун тутар 4 күнүгэр ким чаһыта кыайыыны дуу, хомолтону дуу кэпсиирин көрөөрү буолуо.