Үгэс курдук, правительствоттан үбүлэнэр «судаарыстыбаннай суруналыыстар» «сиэрдээхтэри» үтэн-анньан көрдүлэр. Мироновтан: «Федот Тумусов Госдумаҕа бастаан Аҕыйах ахсааннаах хотугу норуоттар дьыалаларынан дьарыктанар кэмитиэккэ баара, онтон Фармакология кэмитиэтигэр көспүтэ, кини кэргэнэ аптека ситимин бас билэр, ону билэҕин дуо?» - диэн ыйыттылар. Кылаабынай «сиэрдээх» «ким кэргэнэ тугунан дьарыктанара бэйэтин дьыалата» диэн хоруйдаата. Олохтоох кылаабынай «сиэрдээх» холоонноох доҕоро тугунан дьарыктанарын иҥэн-тоҥон интэриэһиргээбэтэҕэ көстөр. 

«Якутия» хаһыат суруналыыһа, арааһа, Тумусов кэргэнин интэриэһин лоббируйдаан «Фармакология кэмитиэтигэр»          көһөн, тыа балыыһалара эми атыылыылларын көҥүллэттэ  диэн санааҕа иэҕэ сатаата быһыылаах. Онуоха Федот Семенович: «Госдумаҕа – «фармакология» буолбакка, Доруобуйа харыстабылын кэмитиэтэ баар, кэргэним пенсияҕа тахсан дьиэтин көрбүтэ-истибитэ 8 сыл буолла,  «суфлердар» сыыспыттар: мин бииргэ төрөөбүт балтым аптекалардаах»,- диэтэ. Тумууһаптар биэс бииргэ төрөөбүттэр эбит уонна бары туспа чааһынай дьыалалаах үһүлэр: «Бары дириэктэрдэрбит», -- диир.

Эрдэ Саха сирин «сиэрдээхтэрин» Госдуматааҕы испииһэктэригэр, Федот Тумусов кэнниттэн, иккис нүөмэринэн Константин Ильковскай (урукку «Якутскэнерго» АО салайааччыта) киирбитэ. Билигин Ильковскайы Госдумаҕа киллэрэр сыалтан, киниэхэ  анаан Забайкальскай кыраайы кытары Бурятия өрөспүүбүлүкэтин холбоон быыбардыыр уокурук оҥорбуттар. Оттон Саха сирин быыбардыыр уокуругар Магаданы, Амур уобалаһын уонна Камчатка кыраайын сыһыары туппуттар. Ол «кистэлэҥин» Федот Тумусов маннык быһаарда: «Саха сиригэр 150 тыһ. куолаһы «сиэрдээхтэр» бигэтик ылыахпыт, мин кэннибиттэн ити ааттаммыт субъектар лидердэриттэн өссө биир киһини Госдумаҕа аһардаары ити регионнары холбоотубут. 4 субъектан мунньан-тараан өссө биир мандат куолаһын хомуйуохпут дии саныыбыт». 

Сергей Миронов суоттуурунан, быйыл Госдумаҕа Саха сириттэн төрүттээх үс киһи киириэн сөп: Иван Грачев, Федот Тумусов уонна Константин Ильковскай.

Саха сиригэр сыһыаннаах дьокутаат сүрүн парламеҥҥа киирэрэ биһиэхэ эгэ эрэ буоллаҕа. Политика, быыбар сарсын умнуллуо. Аһара түһэн, кииннэр курдук бэйэ-бэйэни тырыта тыытыспакка, киһилии киирсэн, элбэх дьокутааты (хайдах да өҥнөннүн-дьүһүннэннин) аһардарбыт наада эбээт.