Бу быһылаан быһаччы туоһута, оҕо тастыҥ эдьийэ Саргылаана ЖИРКОВА кэпсииринэн, Ярославскай уулуссаҕа ДП-1 диэкиттэн Художественнай музейга туораары турдахтарына кыратык салгын хамсаабытыгар суол бэлиэтэ оҕо үрдүгэр сууллан түспүт. Кыыс эрэйдээх төбөтүн, илиитин-атаҕын өлөрбүт. "Суһал көмө" кэлэн эчэйбит оҕону травпууҥҥа илдьэ барбыт. Тиийэн көрдөрбүттэрэ, рентгеҥҥэ түспүттэрэ - мэйиитэ доргуйбут буолан тахсыбыт уонна илиитин-атаҕын бааһырпыт. 
Ол күн куорат олохтоохторо өйдүүргүт буолуо, ханан да ала буркун түспэтэҕин. Анаан-минээн ДП-1 таһыгар буурҕа түспэтэҕэ сэрэйиллэр. Буолаары буолан куорат киинигэр итинник салгын кыратык хамсыа кэрэх сууллан түһэ турар суол бэлиэтэ диэн - иэдээн эбээт! Биирдиилээн дьон дьалаҕайыттан оҕо уокка оҕустарара суох, былырыын биир оҕо автобус тохтобулун тимирэ сууллан улаханнык эчэйбитэ, аны бэлиэлэрбит хампы түһэллэрэ итэҕэс эбит... Киһи ханна да хаамыа суох.
Буруйдааҕы булан ылан муннукка-ханныкка хаайыах эбиппит да, Куорат хаһаайыстыбатын үлэлэтэр сулууспа салайааччыта миэстэтигэр суох буолан биэрдэ. Бэнидиэнньиктэн ылата "ыалдьыбыт" диэн буолла. Онон сарсын СЭГХ куорат тупсаҕайыгар эппиэттиир отделын салайааччыта харда бэлэмниэ диэн эрэннэрдилэр. 
***
Оҕо туруга билиҥҥитэ этэҥҥэ, кэтээн көрүүгэ сылдьар диэн быраастар этэллэр. Оттон төрөппүттэр оҕолоро улаханнык уйуһуйбутун, кута куоппутун кэпсииллэр. Буолумуна, ити айылаахха...
*** 
Аартык.ру