- Бу сууттанар дьону кэккэлэһиннэрэ Вячеслав ШТЫРОВ, Василий ГРАБЦЕВИЧ онтон да атыттар олоруохтара! - диэн доцент этэн саайбытын кэннэ, эбиэт кэнниттэн суут саалатыгар Госдума урукку депутата, билигин көннөрү пенсионер Михаил ЭВЕРСТОВ  илэ бэйэтинэн көтөн түстэ. ШТЫРОВ общественнай көмөлөһөөччүтэ буолан баран ити айылааҕы хайдах аһаран кэбиһиэх этэй?!
***
Бу иннинэ сууттана олорор дьон уонна кинилэр адвокаттара үс прокурортан иккитин - КОТЕЛЯНЫ уонна НИКОЛАЕВАНЫ процесстан туоратыахха диэн хадатаайыстыба түһэрбиттэрэ. "КОТЕЛЯ бастакы процесска эмиэ кыттыбыта, хайаан да буруйдуур санаалаах, туоһулары куттуур, урут биэрбит көрдөрүүлэриттэн бүтүн тыллары ылан "умнан" кэбиһэ-кэбиһэ ааҕар, НИКОЛАЕВА быыс буллар эрэ буруйдуур тыл быраҕар, госбуруйдааччылар кырдьыгы буолбакка эрэ үөһэ салалталарын бирикээһин толорор эрэ аакка сылдьаллар, кырдьыгы таһаарар санаалара суох" диэн.
Судьуйа ХОРУЛИНСКАЯ, биллэн турар, ити хадатаайыстыбаны ылыммата. 
Афанасий МАКСИМОВ судьуйа эмиэ тутулуктаах киһи, Дьокуускай суутун председателэ ЛЕТУЧИХ бирикээһинэн салайтарарын этэр. ЛЕТУЧИХ кэргэнэ прокуратураҕа үлэлиир, онон кини тойоно СР прокурора ПОДЛАСЕНКОТТАН быһаччы тутулуктааҕын ыйар. 
***
Уопсайынан, суут олус айдааннаахтык бара турар. Судьуйа ХОРУЛИНСКАЯ ньиэрбэтэ бүппүт. Үс прокурортан биирдэрэ - ЭВЕРСТОВА эрэ "киһилии сиэринэн  дьыаланы быһаарсар" диэн сууттанааччылар этэн эдэр саха кыыһын симитиннэрдилэр.  Уонна иккитэ КОТЕЛЯ да, НИКОЛАЕВА да улаханнык кыйаханаллара, ордук НИКОЛАЕВА сарылааһыҥҥа кытары тиийэрэ ахтылынна. МАКСИМОВ буоллаҕына "суут буолбатах, судилище!" диэн тымтар... 
***
Сууттанааччылар уонна кинилэри көмүскээччилэр "тус интэриэстээх прокурордары процесстан туоратар туһунан" хадатаайыстыбаны биэрбиттэрин кэннэ судьуйа тохтобул биллэрдэ. Ол кэмҥэ суут саалатыгар уол оҕо одьунааһа Михаил ЭВЕРСТОВ элэгэлдьийэн киирдэ. Хара көстүүмнээх, уот кыһыл хаалтыстаах. Киирдэ киирээт "сиэрэ суох" НИКОЛАЕВА прокурору кытары тыл бырахсан көх-ньэм буолла, күллэ-салла. Ол быыһыгар ШТЫРОВЫ суут ыскаамыйатыгар олордуох буолбут" туоһу ЧЕКУЛАЕВЫ хараҕынан дьөлүтэ үүттүүр. 
МАКСИМОВ "хаһан да быыпсай буолбат" Госдума депутатыгар, урукку ОБХСС начальнигын сүбэҕэ ыҥырар: прокурор НИКОЛАЕВА "этикатын" саралыы  сатыыр. Анарааҥҥыта НИКОЛАЕВА туһунан куһаҕаны саҥаттарыан баҕарбат, "дьахтары инньэ диэбэт куолута" диир. МАКСИМОВА: "Дьахтар быһыытынан... баҕар үчүгэйэ буолуо, ону мин билбэппин", - диир. Аараттан итини  истэ олорор дьон күлэн саһыгыраһа түһэллэр. НИКОЛАЕВА мулук-халык туттар, иһигэр кыынньара сирэйигэр быычалыыр.  
Эмсэҕэлээччи "ЯТЭК" бэрэстэбиитэллэрэ суут саалатыттан тахсыбыттарын кэннэ, доцент ЧЕКУЛАЕВ өлүү түбэлтэлээх соҕотоҕун хаалан хаалар. 
ЭВЕРСТОВКА докумуону көрдөрө-көрдөрө МАКСИМОВ тугу эрэ быһаарсар. ЧЕКУЛАЕВТАН "чуолкайдаһаары" ыйыталлар, киһилэрэ "мне даже противно здесь находиться" диэн этэн баран саалаттан тахсан истэ. Онуоха уол оҕото, Кэбээйи эрэтэ: "НЕ ПОНЯЛ! Это со мной рядом ПРОТИВНО НАХОДИТЬСЯ?!" - диэн сырыһыннара хаһыытаата. ЧЕКУЛАЕВ эргим-ургум көрбүтэ кини диэки дьон бары баран хаалбыттар... мах бэрдэрии... ЭВЕРСТОВ тыыллан турда уонна боппуруоһун чуолкайдаата. ЧЕКУЛАЕВА, сирэйин түһэриэн баҕарбата, ыгылла-ыгылла тугу эрэ ботугураата. Михаил Ильич көрүдүөргэ доценныын тута "эр киһилии быһаарса" таҕыста. Эккирэтэн тахсан тугунан түмүктэниэҕин көрөр баҕа баһаам.
Арай, көрүдүөргэ (Ильич ЧЕКУЛАЕВТАН кыра уҥуохтаах этэ да),  "конкретно" доценын үрдүнэн көрөн турар. Биирдэрэ үрүҥ хараҕын өрө көрбөккө "извините, не так выразился" дии турар эбит. Онтон эйэлэһэрдии: "Давайте, пойдем лучше покурим", - диир. ЭВЕРСТОВ - спортсмен: "Иди! Кури... ПОКА..." - диэн аа-дьуо суостаахтык "көҥүллээтэ"...
Барахсан, үтүө да киһи... ылла да МГУ доценын сынтарытан кэбистэ... Оттон ол доцеммыт МАКСИМОВЫ "аһара барыма, сэрэн" диэн сааммытын туһунан процесска иһиллибитэ ээ. 
***
Бүгүн, муус устар 12 күнүгэр, суут салҕанан бара турар. МГУ доцена ЧЕКУЛАЕВ туоһу быһыытынан көрдөрүү биэриэхтээх. Төһө харчыны ылан өлө-сүтэ "противнай сахалары" кытары сирэй-сирэйтэн анньыһа сылдьара буолла... 
***
Манан диэн эттэххэ, бу дьыалаҕа 170-тан тахса туоһу көрдөрүү биэриэхтээх. Ол иһигэр туоһулар ахсааннарыгар ШТЫРОВ аата эмиэ "баҕа санаа быһыытынан" сылдьар.  Бу 170-тан тахса туоһуттан билигин уончаны кыайбат киһи көрдөрүү биэрдэ. Уһун-киэҥ процесс буолар чинчилээх. Быыбар хампаанньатыгар суут саалатын иһиттэн МАКСИМОВТААХ ПАХОМОВ хайдах кытталлар?
***
Хаартыска былырыыҥҥы сууттан ылылынна. ЧЕКУЛАЕВ доцент бастакы олорор.
Аартык.ру