"Мир" рудникка сир сиҥнибит. Биир киһи эмсэҕэлээбит. Быыһааччылар бу киһини сир анныттан хостоон балыыһаҕа илдьибиттэр. Быраастар этэллэринэн, эчэйбит киһи туруга ама.
***
Санатар эбит буоллахха, "АЛРОСА" руднигар кэнники кэмҥэ субуруччу хас да саахал таҕыста. Урут да тахсара буолуо даҕаны, ол туһунан иһитиннэрбэттэр этэ.
Биэс-алта сыллааҕыта киин улуустан Айхалга үлэлии барбыт эдэр киһи шахтаҕа үлэлии сылдьан сир сиҥнэн улаханнык дэҥнэммитэ. Өлөр туруктаах ый кэриҥэ балыыһаҕа сытар кэмигэр, хампаанньа ГОК салалтата икки уу кырбас оҕолоох  кэргэнин тиийэн үнтү түүрэйдээн," айдаан таһаарыаҥ да олорор уопсайгыттан үүрүөхпүт, кэргэҥҥин бэйэтин буруйдаах оҥоруохпут, туга да суох мантан дьүгэлийиэххит" диэн куттаан 200 эрэ тыһыынчаны быраҕан биэрбиттэрэ. Дьиҥинэн, оччолорго даҕаны шахтер үлэлии сылдьан дэҥнэннэҕинэ мөлүйүөнтэн тахса компенсация көрүллэр балаһыанньата баара. Эдэр киһи сэниэтэ таайан кэлин киһи буолбута эрээри, үлэлиир тэрилтэтиттэн улаханнык хомойон, кэлэйэн, төттөрү төрөөбүт улууһугар төннөрүн эрэ ыраланан сылдьара. "Хас да сылы быһа үлэлээтим да, ыстаарсай оробуочайтан өнүйбэтим. Мин кэннибиттэн кэлбит дьон бары биир-икки сылынан карьералара үрдээтэ", - диэн суҥхарара. Арай, ол саахалтан "туһаммыта" диэн кэлин биир хостоох дьиэни "буор-босхо" ылбыта буолар. Кини "АЛРОСА" рудниктарыгар сотору-сотору саахал тахсар диэн кэпсээбитэ. 
***
Былырыын алтынньы 9 күнүгэр "Мир" рудникка эмиэ саахал тахсыбыта. Онно 200-тэн тахса дириҥҥэ 20 миэтэрэ усталаах сир сиҥнэн 110 киһи сир анныгар хааллаан хаалан баран 109-а бэйэлэрин кыахтарынан тахсыбыттар диэн буолбута. Биир киһи улаханнык эчэйбитэ.
Ити иннинэ атырдьах ыйыгар 365 м дириҥҥэ метан эстэн Удачнайга  икки шахтер өлбүтэ, түөрт киһи улаханнык эчэйбиттэрэ. 
***
"АЛРОСА" АК рудниктарыгар сылы кыайбат кэм иһигэр үс улахан саахал таҕыста. Иэдээн буолбатах дуо?
***
Аартык.ру