- 5 сыл диэн, дьиҥинэн ыллахха, алмааһы кырыылыыр уонна  көмүс киэргэллэри оҥорор салааҕа дьоҕус сыыппара. Ол гынан баран, бу бүгүн биһиги коллективпыт  5 сыллаах үлэтин, сыратын-сылбатын, ситиһиитин ааҕар олохпутугар биир дьоһун   түһүмэхпит дии саныыбын. Биэс сыл анараа өттүгэр, мин кэтэх массыынам салонун иһигэр базаламмыт кыра тэрилтэ, билигин республикаҕа биир саамай бөдөҥ алмаас кырыылыыр уонна көмүс киэргэллэри оҥорор, улахан эргитиилээх хампаанньаҕа кубулуйда, - диэн тэрилтэ генеральнай дириэктэрэ Александр Максимов биир идэлээхтэрин эҕэрдэлиир киирии тылыгар эттэ.

Александр Васильевич "Якутская алмазная компания" ХЭТ ситиһиитигэр аан бастаан кини кэргэнэ - Лилия Николаевна Максимова улахан оруоллааҕын тоһоҕолоон бэлиэтээтэ. Сарын-санныларыгар өйөнсөн бу саха дьиэ кэргэнэ кэлин бэйэлэрин уоллаах кыыстарын кытыннаран, бриллианнаах киэргэллэри оҥорор эйгэҕэ улахан ситиһиилэннилэр.  
Билигин Россия элбэх куораттарыгар, Казахстаҥҥа, Израильга, Арабскай Эмиракка онтон да атын сирдэргэ YDC хампаанньа аата  дорҕоонноохтук иһиллэр буолбута сыралаах-сылбалаах үлэ түмүгүттэн тахсар. Аан дойдутааҕы  үп кризиһин содулугар экономика иэрэҥ-саараҥ турар кэмигэр, киэргэлинэн дьарыктанан, омуктары кытары тэҥҥэ тургутуһан алмаас ырыынагар үрдүк үктэлгэ тахсыы - YDC  хампаанньа менеджменэ тобуллаҕаһын, сатабыллааҕын, аныгы ирдэбилгэ эппиэттиирин туоһулуур. 

Саха сирэ духуобунай култууратынан баайын ЮНЕСКО курдук аар-саарга ытыктанар тэрилтэ олоҥхобутун киһи-аймах уус-уран шедевринэн билиммитэ бигэргэтэр. Айылҕабыт хатыламмат кэрэтэ - Өлүөнэ очуостара аан дойду ытык сирин аатын ылбыта туоһулуур. Духуобунай баай материальнай баайы  кытары тэҥ балаһыанньаҕа турдаҕына норуот сүппэт-симэлийбэт дьылҕаланар. Онон олохтоох тэрилтэлэрбит  үүнэллэрэ-сайдаллара, аан дойду таһымыгар тахсаллара -  биһиги норуоппут экономическай өттүнэн тирэхтээх буоларын хааччыйар. Этэргэ дылы, тот искэ ырыа да ылланар, үҥкүү да сэниэлэнэр буоллаҕа. 

Онон олохтоох тэрилтэбит - "Якутская алмазная компания" ХЭТ 5 сыллаах үбүлүөйүнэн итиитик-истиҥник эҕэрдэлиэҕиҥ уонна кэнэҕэс да саха алмааһын бэйэбит ыччаппыт чочуйан, көмүс уустарбыт  уран тарбахтарынан оҥоһуллубут киэргэллэрин симээн аар-саарга аатыра турдуннар диэн алгыаҕыҥ!