Норуоту түмэр кыахтаах биир эрэ суол баар, ол - ИТЭҔЭЛ. Саха төрүт итэҕэлин тулхадыйбат тулааһынын оҥорорго дьулуспут, дьаныарынан, дьулуурунан дьикти айылҕаны кытары ситимнэспит, Айыы ойууна - Владимир Алексеевич Кондаков үс сыллааҕыта от ыйын ортотугар сырдык тыына быстан турар.

Владимир Алексеевичтыын алтыспыт дьон бары кини сүдү күүстээҕин, аптааҕын-хомуһуннааҕын бэлиэтииллэрэ. Лоҥкунатан куолаһа улахана, көстөр дьүһүнэ-бодото бөдөҥө-садаҥа - дьонтон эрэ таһынан киһи этэ.

Былырыын В.А.Кондаков үлэлэрин мунньан, туох да ааттаах улахан, дириҥ ис хоһоонноох "Аар Айыы итэҕэлэ" диэн үс илии халыҥнаах кинигэ тахсыбыта. Тиэкиһи бэлэмнээн, аттаран биэрээччилэринэн   А.И.Яковлева уонна Т.Т.Тимофеева буолбуттара. Кинигэ тахсыытын  Ил Түмэн дьокутаата, Владимир Алексеевич сиэн быраата Афанасий Максимов үбүлээбитэ.

Билигин, Аар Айыы үөрэҕин итэҕэйээччилэр кииннэрэ,  Дьокуускайга, Көтөр фабрикатын диэки хотугулуу-арҕаа мыраан Ытык хайатын тэллэҕэр олохтонон олорор. Ону сэргэ кыһыл көмүс шпиллээх дьиэ иһигэр В.А.Кондаков аатынан Саха сиринээҕи норуот эмчиттэрин Ассоциацията уонна Саха сиринээҕи Норуот медицинэтин, итэҕэлин научнайдык чинчийэр "Үрүҥ Аар Тойон" тэрилтэ үлэлиир.
Саха итэҕэлин сиэринэн анараа аттаммыт киһи уҥуоҕун тааһа үс сыл иһигэр туруоруллуохтаах. Онон, быйыл, Айыы ойуунун Владимир Кондаков уҥуоҕар мрамор тааһынан өйдөбүнньүк оҥоһуллан туруорулунна.