"Дьокуускай куорат уонна аттынааҕы бөһүөлэктэр сирдэригэр-уоттарыгар ханна да баһаар суох" диэн бүгүҥҥү Дьокуускай куорат дьаһалтатын мунньаҕар эттилэр. Арай, "В Якутии.ру" интернет-хаһыат биллэрэринэн, Саха сиригэр  улахан уот: Намҥа, Уус Майаҕа, Хаҥаласка, Уус Алдаҥҥа, Чурапчыга, Аммаҕа турбут. Бу баһаардары умулуннарарга Дьокуускай, Хабаровскай баһаарынайдара үлэлии сылдьаллар эбит.  
Буруоттан сылтаан, от ыйын 14 күнүгэр, Дьокуускай аэропордуттан  биир да улахан сөмөлүөт көппөккө турар. Улуустарга дьоҕус авиация көтөр буолан, хаайтарыы суох.
"Якутия", "Трансаэро", "Глобус" авиахампаанньалар спортивнай  оонньуулар кыттыылаахтарын дьиэлэригэр илдьиэхтээхтэрэ эмиэ хаалбыт. Халлаан ырааһырдар эрэ рейстэр саҕаланыахтара диэн аэропорт диспетчердэрэ этэллэр. Тустаах сулууспалар хаайтарбыт дьону аһаталаан, хонуктарын булларбыттар.