Бэҕэһээ, от ыйын 10 күнүгэр, "Эхо столицы" куорат хаһыатын сүрүн редактора Евгений Грибчатов баҕа өттүнэн дуоһунаһыттан баран эрэрин туһунан сайабылыанньа суруйбут.

Быыбар аайы - саҥа мээр талылыннаҕын ахсын куорат хаһыатын редактора уонна "Эхо столицы" МУ дириэктэрэ уларыйан иһэр. Ол курдук Юрий Заболев мээрдиирин саҕана дириэктэринэн Василий Соловьев, редакторынан Евгений Грибчатов ананан үлэлээбиттэрэ. Соловьев бу саас Айсен Николаев баһылык дуоһунаһыгар үктэнээтин кытары ууратыллыбыта. Кини оннугар биллиилээх суруналыыс Иван Николаев уола - Игорь Николаев анаммыта.
"Редактор эмиэ уларыйар" диэн сурах тарҕаммыта ыраатта. Ол күн бэҕэһээ кэллэ.

"Эхо столицы" хаһыат 1989 сыллаахтан, "Эхо недели" утумнааччытын быһыытынан тахсар. Илья Михальчук куораты салайарын саҕана 1999 сыллаахха хаһыат аата уларыйар, сүрүн редактор Людмила Левина оннугар Андрей Петров ананар. Петров "Киин куорат" диэн сахалыы сыһыарыы таһааран барар, коллективы саҥаттан кэриэтэ таҥар.

Бу куорат хаһыаттарыттан, кэлин, элбэх талааннаах, туспа суоллаах-иистээх суруналыыстар  үүнэн тахсыбыттара: Виктория Габышева, Елена Степанова, Елена Тихонова, Андриан уонна Леонид Николаевтар, Виталий Иванов-Сур, Валерий Васильев-Муттуххай Бороҥ, Татьяна Захарова - Лоһуура, Игорь Платонов, Игорь Саввинов, Иван Булдаков онтон да атыттар.  Хаһыакка суруналыыстыка "аксакаллара" Дмитрий Бубякин, Прокопий Чуукаар, Андрей Аргунов курдук улахан ааттаах-суоллаах дьон үлэлээбиттэрэ. 

Урукку "Эхоттан" билигин хаһыакка үс эрэ киһи хаала сылдьар - Ирина Мартынова сүрүн редактор солбуйааччыта уонна суруналыыстар Сардаана Сивцева-Санаайа, Аламжи Будаев - Али Можайскай. 

Хаһыат 20 сылын тухары туох да баһаам редакторы уларытта. Саамай уһуннук Людмила Левина уонна Андрей Петров үлэлээбиттэрэ. Чуолаан, Андрей Петров кэмигэр икки хаһыат тираһа муҥутуу элбээн 18 тыһ. тиражка тиийэ сылдьыбыта. Кэлин сотору-сотору редактор уларыйар буолан, политика "көбүөр аннынааҕы" оонньуутун тулуйбакка хаһыаттар сыккырыыр тыыннара эрэ хаалла. Быыбартан быыбарга эрэ диэри туттуллар "кумааҕы" эрэ  буоллулар. 

Кэлэр 2015 сылга диэри сүрүн быыбардар ааһыахтара, саатар ол долгунугар олорсон куорат хаһыаттарыгар саҥа салалта өттүттэн болҕомто ууруллар ини дии саныыбыт.