Дьиҥинэн, быйыл Лондоҥҥа олимпиада ыытыллыбата эбитэ буоллар, уолбутун эҕэрдэлиэ этибит. Ону баара...
Чемпионакка, икки сүүсчэкэ "ыалдьааччы" Саха сириттэн тиийбитэ. Саха көрөөччүлэрэ киин трибунаны ылан былаахтаах, барабааннаах олорон Викторга "ыалдьа", күүс-көмө буола сатаатылар. Чеченнэр даҕаны Джамал Отарсултановтарын улаханнык өйөөтүлэр.
"Саха"НКИК ханаалга Виктор хапсыһыытыттан балыырдаах диэбиттэрин эрэ быһа тардан көрдөрдүлэр. Михаил Эверстов турнир кэнниттэн биэрбит интервьютугар "икки баалы балыйдылар" диэн эппитэ. Ол гынан баран,  хапсыһыы уопсай хартыынатыгар илэ көрдөххө, Лебедев Отарсултановтан биллэ баһыйтарар этэ. Сэниэтэ суоҕа, кубаҕайа... Чечен тренерэ иккитэ бэйэтин бөҕөһүн "балыйдылар" диэн бырачыастыы сылдьыбыта. Кыйаханан туран "очко" аахтарбыта.  
Оттон Госдума урукку дьокутаата Михаил Эверстов "мандатым суох буолан көбүөр кэннинээҕи кэпсэтиини кыайбатым" диэн эппитэ. Чеченнэр бу сырыыга улаханнык туруммуттар. Чемпионат хас биирдии кыайыылааҕар 50 тыһ. дуоллары туттартаатылар. 
Биллэн турар, улахан спорт - улахан харчы. Тустууга Кавказ омуктара, чуолаан дагестаннар күннээн-күөнэхтээн сылдьаллар. Кинилэр быыстарыгар саха бөҕөстөрө быычалаан киирэллэрэ - олус уустук. Букатын уһулуччу буолалларын ааһан, булгуччу кэннилэригэр кыахтаах дьон тураллара ирдэнэр. 
Чемпионакка Саха сирин президенэ Егор Борисов эмиэ баара. Егор Афанасьевич былырыыҥҥыттан ыла олимпийскай чемпиону бэлэмнииргэ 17 мөл. 200 тыһ. бюджеттан көрдөрбүтэ.  Бэйэтин соһуччу соҕустук дьоҥҥо-сэргэҕэ көрдөрөр киһи - Михаил Эверстов ону улаханнык "мыынан" хаста да өрөспүүбүлүкэ салалтатын хаарыйан турар. Михаил Ильич чемпионат кэмигэр биэрбит интервьютугар "Лебедев ыйааһын түһэрэригэр иккитэ өйүн сүтэрбитин, онно сөптөөх быраас суоҕун,  быйыл кыһын гаас быычалаан угаардаабыта доруобуйатыгар охсубутун, доруобуйатын чөлүгэр түһэрэригэр өрөспүүбүлүкэ көмөлөспөтөҕүн" туһунан абаран эппитэ.
- Президент өйүүрүн көрдөрөн сырса сылдьыахтаах этэ дуо? - диэн ыйытыыга, Эверстов "бэйэтэ хаста да салаталтаны кытары көрсө сатаабытын "приемнаабатахтарын"  эппитэ.
Михаил Ильич биир өттүнэн, баҕар, Госдума дьокутаата статустаах сылдьан уолугар улаханнык көмөлөспүтэ буолуо. Ону итэҕэйиэххэ сөп. Ол гынан баран, кини Лебедевинэн сирэйдэнэн, бэйэтин тус сыалын ситиһиэн баҕарарын эмиэ киһи уорбалыан сөп.  
Эверстов интервьютугар "чечен бөҕөһүн үрдүгэр кирпииччэ түстэҕинэ" Лебедев олимпиадаҕа кыттыан сөп диир. Чеченнэр уолларын харыстаан, билигин кини үрдүнэн сахсырҕаны да көтүппэт буолуохтаахтар. Уонна оттон харчыларын оҕото сыттаҕа.
Сурах быһыытынан, олимпиадаҕа саха бөҕөһүн кытыннарар туһунан "үлэ баран" эрэр үһү. Дьэ, ким билэр, омуктар олимпиада мэтээлиттэн аккаастанар санаалара суох буолуохтаах.
***
Үгүс киһи Егор Борисов чемпионакка быһыытын өйдөөбөтө. Президеммит, Лебедев хотторбута биллээтин кытары, сулбу-халбы миэстэтиттэн ойон туран баран хаалла... Егор Афанасьевич, дьиҥинэн, хапсыһыы түмүгүн көрөн, уолга чугаһаан, уоскутан илии тутуспута буоллар уонна кыайбыт чечен бөҕөһүн ытыһын эмиэ ыга туппута буоллар - дьоҥҥо олус кыраһыабайдык көстүө этэ. Чеченнэр курдук дуолларынан мохсуо бырахпатар да, сувенир сыыһын көбүөр кэнниттэн илдьэн бөҕөстөргө туттартаабыта буоллар - улахан имиджы оҥостуоҕа хаалла.

Виктор Лебедеви киһи сирэй-харах анньара табыллыбат. Арассыыйаҕа иккис чулуу буолар даҕаны улахан сыраттан тахсар. Түөрт сыллаах үлэтин түмүгэ, сыала-соруга билигин туолбатаҕар кини ордук хомойбут-хоргуппут буолуохтаах. Аны дьон эрэлин уйуу уонна тоҕуу тустаахха улахан охсуу буоларын өйдүөххэ наада. Уолбутун санаатын көтөҕөн, салгыы сайдарыгар көмө-тирэх буолуоҕуҥ, доҕоттор.