Миниистир Виктор Кошелев коррупцияны утары миитиҥҥэ сырытта уонна...

Воскресенье, 08 Апреля 2012 09:06
Оцените материал
(0 голосов)

IMG_2990_copyБэҕэһээ Дьокуускайга быраабы араҥаччылыыр уорганнарга коррупцияны утары миитин тэриллибитин туһунан суруйбуппут.

Норуот дьокутаатын Афанасий Максимовы уонна кини биир идэлээхтэрин - Игорь Чикачевы, Игорь Пахомовы босхолуур, дьыаланы саҥаттан атын састааптаах суут дьүүллүүрүн туруорсар миитин элбэх киһини түмтэ.

Миитиҥҥэ боростуой дьону кытары "хотугу ыаллар" ааҕыннара эмиэ сылдьаллар көстөр. Ыраахтан кэтээн көрөн дьон ахсаанын ааҕаллар, хаартыскаҕа түһэрэллэр, камераҕа усталлар. 

Миитиҥҥэ полиция, милииссийэ үлэһиттэрэ эмиэ бааллар. Олор истэригэр  урукку Ис дьыала миниистирдэрин солбуйааччытынан үлэлээбит А.Дзивицкэй көстөр. Кинини сэргэ Саха сирин үс кыра былааҕын хомуйа туппут эдэр киһи турар, ол аттыгар билиҥҥи миниистир Виктор Кошелев эмиэ баар.

Миитиннээччилэр плакаттарыгар Кошелевка анаммыт ис хоһоонноох ыҥырыылар бааллар: "Новый министр!  Наведи порядок в МВД!", "Генерал Кошелев! Верни честь якутской милиции!" о.д.а. 

Виктор Кошелевтан Aartyk.ru суруналыыһа аҕыйах ыйытыыга санаатын этэригэр көрдөстө:

- Тойон миниистир, эйиэхэ туһаайыллыбыт лозуннары аахтыҥ дуо?

- Бачча сыл с дьыала структуратыгар үлэлээбитим тухары, миэхэ анаммыт лозуннары саҥа аахтым.

- Уонна туох санааҕа кэллиҥ?

-  Бу миитиҥҥэ сылдьан общественность санаатын иһиттим, биллим дии санаатым. Дьон санаатын аһаҕастык этэрин ким да омнуолуу санаабата буолуо. Күүһүм-кыаҕым тиийэринэн мин салайар ведомствобар сокуон өрө тутулларын хааччыйа сатыам диэн эрэннэрэбин.

- Быраабы араҥаччылыыр уоргаҥҥа ол аата коррупция баар?

- Саба быраҕан "коррупция суох" диэн быһа этэр кыаҕым суох. Утары охсуһабыт.

- Яков Стахов федеральнай ирдэбилгэ сылдьар дуу, эбэтэр аан дойду ирдэбилигэр сылдьар дуу?

- Федеральнай ирдэбилгэ сылдьар.

- Көрдүүгүт?

-  Биллэн турар, дойду үрдүнэн ирдэбилгэ сылдьар киһини көрдүүр үлэ хайаан да ыытыллар.

- Эн иннинээҕи ИДьМ миниистирдэрэ: Александр Назаров уонна Яков Стахов Саха сиригэр кэлэн "үлэлээн" бөрүкүтэ суох уолу-ииһи хаалларан бардылар. Эн итиннэ сыһыаныҥ хайдаҕый?

- Өйдөөх киһи атын дьон алҕастарыгар үөрэнэр. Мин бэйэбин хаһан да, акаары киһинэн ааҕыммат этим... Онон кинилэр суолларын батыһыам суоҕа. Национальнай өрөспүүбүлүкэҕэ ананан үлэлии кэлбитим миэхэ интэриэһинэй. Олоҕу-дьаһаҕы, култуураны, историяны олус сэҥээрэн үөрэтэ сылдьабын... Билигин манна миэхэ барыта интэриэһинэй курдук... Бу миитин эмиэ.

- Миитиҥҥэ төһө элбэх үлэһитиҥ бэрээдэги көрөрүй?

- ...Үс-түөрт киһи баар буолуохтаах.

- Дьиэ кэннигэр ОМОН саһан турбат дуо?

- Наада буоллаҕына дьиэ кэнниттэн да буолбатар кэлиэхтэрин сөп. Ол эрээри миитинниир дьону үрэйэргэ буолбатах, төттөрү кинилэри провокациялыыр түгэннэригэр бэйэлэрин көмүскээри... Уонна мин көрүөхпэр туох да оннук айылаах тыҥааһыннаах тэрээһин буолбата ээ. Дьон санаатын сокуону кэспэккэ этэрэ тоҕо омнуоланыахтааҕый?

Виктор Кошелевтыын итинник тэттик кэпсэтии таҕыста.

Манна диэн эттэххэ, саҥа миниистирбит саатар биһиги көрөрбүтүгэр-истэрбитигэр  итинник тыллаах-өстөөх буолара - бэтэрээ. Назаровтаах Стахов букатын даҕаны аһаҕастык сэнииллэрэ, тэпсэллэрэ этэ буоллаҕа.

***

Миитини туораттан кэлии киһи көрдөҕүнэ хайдах буолуой? Уоттаах-төлөннөөх тыллар, ол быыһыгар Аскалон Павлов, Лэгэнтэй сүрү дьигиһитэр ырыалара... Сүрдээх омуктар дииллэрэ буолуо, ээ?

***

Ил Түмэн дьокутаата Владимир Федоров "оннооҕор биһиги манна, кытыы сиргэ, дойдубут букатын  ханна эрэ атын сиргэ халыйан баран иһэрин билэбит, Арассыыйа уһуктан эрэр, Саха сирэ толкуйдуур буолан эрэр" диэн трибунаттан тыл эттэ.  Кини кэнниттэн "Русь" диэн ырыа ансаамбыла бэрт иһирэх матыыптаах "Русь моя" диэн ырыаны ыллаан унаарыттылар: "Ах, ты, Русь,моя, неподкупная..."

***

Александр Джурович Данилов - Гордума дьокутаата тыл этэн баран, онтун ситэрэн Aartyk.ru ааҕааччыларыгар чиҥэтэн биэрдэ:

- Норуот дьокутаатын Афанасий Максимовы утары тэриллибит холуобунай дьыала сакаастаммыт политическай дьыала.  В.Штыров өссө дьыала тэриллэ, суут буола да илигинэ Максимовтааҕы дьон сэргэ истэригэр улаханнык "кинилэр-уоруйахтар!" диэн дьаралыктаабыта. Ол кэнниттэн дьэ өрүһүспүт курдук силиэстийэ, дьыала тэриллэн барбыта. Дьон куттанан бүтүөхтээх, хайа муҥун муннугу-ханныгы кэйэ сылдьыахпытый?! Хорсун санаалаах дьон бүгүн бары манна муһуннулар, куттастар хорооннорун иитин кэҥэтэ сыталлар!

***

Элбэх дьон бу күн, миитини сырдатаары кэлбит суруналыыстары сырса сылдьан  бэйэлэрин кыһалҕаларын кэпсээтилэр. Кырдьык, чаххчы күннүүр күнэ биһиги сирбитигэр кэлэрэ дуу, сулҕа дуу... "На всех оборотней в погонах, ворошиловских стрелков не хватит", - диэн саастаах дьахтар интервьютугар этэр. М. эмиэ улахан кыһалҕаҕа кыпчыттаран, атаҕастанан хаста да полицияларга үҥсүү түһэрбит да, баттааччы-атаҕастааччы солото үрдүгэ, хармаана халыҥа бэрт буолан кырдьыгын булбакка сылдьар. Итинник М. курдук дьон хара баһаамнар. 

***

Миитин сааскы көй салгыны хамсатан, куорат тыаһын-ууһун сабырыйан  сахалыы оһуохайынан түмүктэннэ. 

Миитин резолюциятыгар-тэн тахса киһи илии баттаата.  

 

 

 

Генерал Кошелев! Верни честь якутской милиции!

- Новый министр! Наведи порядок в МВД!

МВД! наведи порядок в 

Добавить комментарий

Защитный код
Обновить

Aartyk.ru