08.08.08 сыллаахха СӨ президенэ В.Штыров, АЛРОСА АК президенэ С.Выборнов, «Якутгазпром» ААО генеральнай дириэктэрэ А.Абдурагимов буолан Ис дьыала миниистирин Яков Стахов аатыгар сайабылыанньа түһэрэллэр: «Кимнээх эрэ, соторутааҕыта, «Якутгазпром» АО уонна «Саханефтегаз» ННГК интэриэһин күөмчүлүүр, улахан суумалаах албын-көлдьүн дуогабар түһэрсибиттэр», - диэн.
Бастатан туран, субъект баһылыга дуоһунаска тахсарыгар мэктиэ тыл биэрэр – Төрүт Сокуону ытыктыам, киһи быраабын өрө тутуом диэн. Сокуон этэринэн, президент кими да утары суукка үҥсүү түһэриэ суохтаах. Биллэн турар, президент үҥүстэҕинэ, ханнык суут үрдүк сололооҕу өрө көрөн туран утары барыай?! Ол иһин президент аатыттан быһа суукка үҥсэр быраабы сокуон төрдүттэн быһар.
Ол да буоллар президент сокуону кэһэн туран үҥсэр. Кесарева силиэдэбэтэл бу Абдурагимов, Выборнов уонна Штыров сайабылыанньаларыгар олоҕуран 08.08.08 сылга «биллибэт дьону утары» холуобунай дьыала көбүтэр быһаарыы ылар.
Дьиҥинэн, ол «биллибэт дьоно» кимнээҕэ биллэллэр – норуот дьокутаата, «Саханефтегаз» ННГК президенэ, «Якол» НК баһылыга Афанасий Максимов уонна кини солбуйааччыта Игорь Чикачев. Ону суут-докумуон кумааҕытыгар соруйан ахтыбаттар. Тоҕо диэтэххэ, ыллыҥ да дьокутааты утары холуобунай дьыала тэрийбэккин. Сокуонунан көрүллүбүт тустаах бэрээдэги аастаххына эрэ дьыалаҕа эрийэр кыахтааххын. Биллэн турар, холуобунай дьыаланы көбүтэр төрүөт Максимовы утары суох. Дьиэтин-уотун дьэгдьийэн, төлөппүөнүн уоран истэн, кумааҕытын-докумуонун хаһан эрэ – «матырыйаал» хомуйуохха сөп. Ол иһин, «эйигин, дьокутааты утары дьыала тэрийбэппит, биллибэт дьону көрдүүбүт онон ааҥҥын ас, дьиэҕин дьэгдьиттэр» диэн түүрэйдээн, кыра оҕо-уруу баарын аахсыбакка, 4 сылы быһа Максимовы дьиэтин-уотун тэпсэн, ойоҕун-оҕотун куттаан, аймахтарын аймаан… быһата «биллибэт дьону» чуолаан кини дьиэтигэр, тэрилтэтигэр көрдүүллэр.
Аны Максимов көмүскэнэр кыаҕа суох. Тоҕо диэтэххэ, эмиэ эргийэн кэлэн «кинини утары тэриллибэтэх дьыала буоллаҕа - биллибэт дьон көрдөнөр, онно эн тоҕо кыттыһан көмүскэнэ сатаатыҥ?!».
Ол түөрт сылы быһа Штыров сорудаҕынан булуллубут «матырыйаал» аны, хайдах да холуобунай дьыала буолар кыаҕа суох. Бэйэтин бэйэтэ дьаһанар - коммерческэй тэрилтэ оҥорор өҥөтүн сыанатын бэйэтэ быһаарар. Ким даҕаны дьиэ тутар биригээдэни «харчытын кэлин хантан эрэ төлүөм, бэйэҕит суоккутугар тутан эриҥ» диэн баран, туттаран баран өссө «ыарахан сыаналаахтык тутан биригээдэҕин татым олохтоон сылдьыбыккын» диэн биригэдьиири хаайыыга уктарбат ээ. Биригээдэ үлэһиттэрэ ону утаралларын, «татымнык олорботохпут» диэн этэллэрин үрдүнэн салайааччыларын хаайыыга ылан симии – аһара барыы Наһаа сууттаһа сатаатахтарына, наайа буоллар, хаһаайыстыбаннай мөккүөр быһыытынан мировой судьуйанан быһааттарыах этилэр. Оттон тэрилтэлэр арбитраж суутугар үҥсүөхтэрэ этэ.
Эмиэ сол курдук президент Штыров сорудаҕынан, правительство дьаһалынан Талакаан уонна Витим икки ардынааҕы ньиэп турбата эргэрэн тоҕо ыстаммытыгар, «Саханефтегаз» ННГК президенигэр Афанасий Максимовка саҥа турбаны бэйэтин суотугар туттарарга быһаараллар. Максимов турбаны бэйэтин үбүгэр тутар. Харчы булаары араас быыс-хайаҕас көрдөөн, бэйэтин тэрилтэлэрин икки ардыгар харчы хамсатар. Ол кэлин суукка кинини утары «массыанньыктааһын» ыстатыйанан туттуллар.
Талакаан уонна Витим икки ардыгар ньиэп турбата тутуллар. Ону аһара «сыаналаахтык туппуккун, «Саханефтегаскын» иэдэппиккин» диэн буруйдуулларын кэриэтэ, «Саханефтегаз» «иэдэйбэтэхпин» диэн этэ сатыырын үрдүнэн Максимовтаах Чикачевы ылан 6-7 сылга күлүүс хаайыытыгар ыытан кэбиһэллэр.
«Ол барыта сокуон быһыытынан оҥоһуллубута» диэн судьуйа Николаев бүгүн эттэ... Кини быһаарыытынан, билигин күрүөйэх оруолугар сылдьар генерал Стахов бирикээһинэн, Штыров ыйыытынан-кэрдиитинэн, Кесарева силиэдэбэтэл, биир күн начальник эбээһинэһин толорон холуобунай дьыала көбүтэргэ илии баттаан эрилиппитэ – сокуон иһинэн эбит.
Кесарева бу дьыала туһуттан, суукка кэпсээбитинэн, Афанасий Максимов дьокутаат буоларын бэркэ диэн билэр эбит, ол гынан баран кини «Саханефтегаз» ННГК президенэ, «Якутгазпром» АО салалтатыгар баарын букатын «билбэтэх» үһү.
Кесарева силиэдэбэтэл, үлэһит муҥутаан, сарсыарда бу күн 08.08.08. сарсыарда 07.00 чааска үлэтигэр кэлбит (суукка кэспииринэн). Уонна икки чаас иһигэр «дьыаланы үөрэтэ охсон» 09.00 чааска бэлиэр «холбуобунай дьыаланы көбүтэр» быһаарыы ылбыт.
Үөһээ ахтыллыбытын курдук, холуобунай дьыала «биллибэт дьон утары» тэриллибит. Ити барыта, судьуйа Николаев быһаарбытынан «сокуон иһинэн оҥоһуллубут».
Николаев эдэр киһи, карьерата өссө иннигэр. Дьыала үс күн көрүлүннэ. Онтон 2 күнүгэр утарыта өрүттэр санаалара этилиннэ. Тиһэх күн судьуйа быһаарыы аахта.
Өскөтүн судьуйа Николаев Максимовтаах Чикачев үҥсүүлэрин сөптөөҕүнэн аахпыта эбитэ буоллар, 4 сылы быһа хааһына харчытыгар ирдиир-силиэстийэлиир уоргаттар «үлэлэрэ» барыта тоҕуллар. Киһи-сүөһү бөҕөтө үлэтэ суох хаалар, сорохторо этабынан утаарыллаллар. Ону ханнык уорган баҕарыай?
Комментарии