Олег Тарасов: «Электроэнергиянан хааччыллыыны тупсарарга судаарыстыба көмөлөһүөн наада»

Пятница, 26 Августа 2011 09:42
Оцените материал
(0 голосов)

16.10-2Соторутааҕыта ыытыллыбыт праймеризкэ бастакы 20 ахсааныгар киирбит Ил Түмэн дьокутаата, «Биир ньыгыл Арассыыйа» фракциятын чилиэнэ, «Якутскэнерго» ААО АК генеральнай дириэктэрэ Олег Тарасовка уотунан хааччыллыыга олус элбэх боппуруос киирбитэ. «Аартык.ру» Интернет-порталга дьон ыйтыытын түмэн, Олег Владимирович маннык хоруйдуур:
- Мин Госдума дьокутаатыгар дьиҥнээхтик дураһыйбаппын. В.Путин көҕүлээн «Норуот фрона» тэриллибитин өйөөн, кырдьык даҕаны, судаарыстыбаннай политиканы оҥорсорго элбэх дьон санаатын түмэр, иһитиннэрэр кыах бэриллибин биһирээн, кандидатурабын туруоралларыгар сөбүлэспитим.


Өрөспүүбүлүкэбит сирин баайын туһаҕа таһаарыы суолтан уонна уоттан улахан тулуктаах. Электроэнергията суох ынах да ыаммат, алмаас, чох да хостоммот. Онон да сылтаан, праймеризкэ уотунан хааччыллыы чааһыгар өрөспүүбүлүкэ олохтоохторо энергетиктарга элбэх боппуруос биэрдилэр.
50-60-с сылларга тутуллубут подстанциялар, быһаччы толкуйдаатахха даҕаны -- уот барар линията, баҕаната – эргэрэн, кээһэнэн бүтэн эрэллэр. Маны сөргүтэргэ сылга 500 мөл. солк. ирдэнэр. Харчы көрүллэрэ эбитэ буоллар, икки сылынан уот ситимин саҥардан бүтэ сыһыах этибит. «Якутскэнерго» хаһаайыстыбата электроэнергия тарыыбын иһинэн көрүллэр-истиллэр. Тарыыбы хас да уон төгүл үрдэттэхпитинэ эрэ, эргэрбит оборудованиебытын саҥардар кыахтаахпыт. Ол кыаллыбат. Онон хайаан да өрөспүүбүлүкэ, федеральнай киин хааһыналарыттан үп тыырыахтарын наада.
Арҕаа, Бүлүү улуустара Саха сирин хайа да түөлбэтинээҕэр уотунунан хааччыллыылара үчүгэй. Бүлүү 1-кы, 2-с, 3-с (Светлэйдээҕи ГЭС) гидроэлектростанциялара бааллар. Ону таһынан Мииринэйдээҕи ГРЭС (дизель уонна гаас турбината баар) кыамтатын ааҕыстахха сылга 80 МВатт оҥоһуллар. Урут Сунтаарга уот күүһэ 110 КилоВольт эбит буоллаҕына, Мииринэй уонна Сунтаар икки ардыгар үрдүк күүрүүлээх линия үлэҕэ киирэн, 220 КилоВольт буолла. Онтон сиэттэрэн Ньурбаҕа уот күүрүүтэ номинальнайга – 110 КилоВольтка таҕыста. Урут итиннээҕэр быдан кыра күүрүү бэриллэ турбута. Онон дьон уот чааһыгар үҥсэргиирэ өйдөммөт.
Ол гынан баран, Ньурбаттан тэйэн истэххэ, кытыы нэһилиэктэргэ уот күүрүүтэ намтаан иһэр. Ол электричество барар линиялара эргэрбиттэринэн быһаарыллар. Ньурба уотун ситимэ Накыыннааҕы ГОК сайдыытын кытары кэлимсэ бырайыактанан саҥардыллыахтааҕа. Ити боппуруос билигин үп кризиһинэн сибээстээн быһаарылла илик. Өрөспүүбүлүкэ уонна федеральнай киин кыттыһан үбүлээтэхтэринэ хамсааһын тахсыаҕа.
Арассыыйа 20% энергоресурсатын саппааһа Саха сирин соҕуруу өттүгэр баар. Экологияҕа саамай содула суох АЭС буолар, ол гынан баран ханнык эмэ төрүөтүнэн саахалланнаҕына – бүтэбит. Онон, ГЭС-ны, чуолаан, үрдүк хайа хапчааннардаах өрүстэргэ тутар, экологияҕа охсуута быдан кыра буолуо. Канкуннааҕы ГЭС тутуллара былааннанар сиригэр дьон түөлбэлээн олорор сирэ суох. Бултуур, сынньанар аҕыйах бааза баар. Ити баараҕай былаан билиҥҥитэ бырайыактана сылдьар. Судаарыстыбаннай экспертизэни этэҥҥэ аастаҕына 2020 сылга диэри тутуллара сабаҕаланар.
Туох барыта харчыга кэлэн кэтиллэр. Чуолаан, олоҕу сайдыбытын мээрэйдиир икки көстүү -- суол уонна уот элбэх үбү эрэйэр. Ханнык эрэ баай киһи кэлэн, биир түөлбэ кыһалҕатын биир күн баһыыран кэбиһэрин күүтэр көрүдьүөс. Онон, федеральнай былааһы хамсатан, хааһынатын сэгэттэрэн, суолга үп көрөрүн курдук уокка эмиэ харчы аныырын туруорсуохха наада. Итиннэ биллэн турар, парламент, ситэриилээх былаас уонна энергетиктэр түмсэн үлэлииллэрэ наада.

Добавить комментарий

Защитный код
Обновить

Aartyk.ru