Сорох дьон «атыны ааттаһыахтааҕар, көмө көрдөһүөхтээҕэр, бириэмэҕин сүтэриэхтээҕэр, сыраҕын  ууруохтааҕар, наадыйар сууммаҕар хас да киһиэхэ иэс киириэхтээҕэр, кылгас, түргэн, чэпчэки суолу тутуһан баай БААҤҥа тиийбит ордук» дии саныыллар.

БААНнарбыт килэйэн-халайан ыраас, сиэдэрэй оҥоһуулара, тас дьүһүннүүн кытары тупсаҕайдара, үлэһиттиин аламаҕайдара, бары ыйытыккар бэлэм эппиэттэрэ, быһаарыылара,  сүрдээх эппиэтинэстээх сыһыаннара тустаахха кыһыл көмүскэ тэҥнээх көмө буолар. Киирбит клиентан аҕыйах ахсааннаах наадыйааччыны кураанах, илии тутуура суох  ыытарга аналлаах, сыаллаах-соруктаах үлэлииллэр.

Аныгы олоххо  КРЕДИТэ суох олорооччу тарбахха баттанар

Сэнэх саҥыйахтаах, кэтэн эрэр сонноох,  түү кууркалаах  эрээри, саҥа саҕынньахха баҕарааччы кэрэ аҥаар баһаам.  Сүүрэ сылдьар «Сузукилаах» эрээри, иккис көлөҕө наадыйан кредиккэ киирээччи күүстээх аҥаар ахсаана да аҕыйаҕа суох. Сааһыттан тутулуга суох хастыы да СИМкалаах үрүт үөһэ төлөппүөн диэн… аахтахха араас холобур үтүмэн.

«Олорор дьиэни ипотеканан ылыы» диэн кытары КРЕДИТ көрүҥэ баар. Биир эдэрчи киһи: «Хайдах, хас эмэ сыл тухары, ипотеканы эрэ төлөөрү күнү-быһа үлэлиэхтээхпиний?» - диэбитин истэн баран, ыччаттарын туһунан санаабат ыал баһылыга диэбиттээҕим. Кэлин, кредит туһунан ырытан көрөн баран, ол киһини хорутан толкуйдуур маладьыас эбит ээ, диир санааҕа кэллим.

Дэриэбинэлэргэ эмиэ КРЕДИТ көрүҥэ баар буолбута ыраатта. Атыы кэллэҕинэ саҥаны көрбүччэ, бүппэтин эрэ диэбиттии, дьиэтигэр баарын да иһин, туһатын толкуйдаабакка, үөрэ-көтө ИЭС суруттаран баран арааһы бары ылаллар. Бириэмэтигэр утары уунар харчыта суох иэс ылыы босхо ылбыт саҕа сананааһын. Тугу баҕарар суруттаран ылааһын – эмиэ   хабала биир көрүҥэ. Ыйга биирдэ кэлэр быыкаайык биэнсийэттэн, биитэр тыа сирин кыра хамнаһыттан төлөһөөрү  суоттаммыттара, харчылара ордубакка, хойутаан «бабат» диэн абараллар да… туһа суох. Аныгыскы ыйга диэри иһи ыга баанартан атын суол суох. Кыһалҕа кыччыахтааҕар өссө эбиллэр.

Кырдьык да, КРЕДИТ диэн олоҕу ИЭС олоруу буолар.  Ыларга туох барыта дөбөҥ. Төлөһөр күнүҥ-ыйыҥ тирээн кэллэҕинэ, харчыгын кээмэйдээн туттубакка, кураанах ытыскынан нэлэйэн олордоххуна эн эрэ эрэйдэнэҕин. Бүтүн бэйэҥ барар сириҥ баҕана үүтүнүү аччыыр, кыччыыр.

Иэскэ киирии эрэйин билбит киһилии суруйан субуруттум да, хата туох дуу, ким дуу көмөтүнэн этэҥҥэ итинник балаһыанньаҕа киирэ иликпин. Наадыйдахпына, бырыһыаҥҥа ылан туттабын. Кредиттан атына - хас ыйга, кимтэн ыларгыттан бырыһыана тутулуктаах. Чугас дьонум да, кэккэ табаарыстарым да  маннык өҥөнөн мин нөҥүө эмиэ туһаналлар.

Тутууга сыһыаннах «Долевой» диэн өҥө ордук эбит диэн билэр дьоммор сүбэлээбитим хас да киһи дуогабар түһэрсэн төлөһө сылдьаллар. Кредиттан атына бырыһыан диэн суох.  Ылыахтаах дьиэҥ суумматыттан төһөнү төлүүргүттэн ордубут харчытын тутуу киириэхтээх күнүгэр диэри түҥэтэн ыйынан төлүүгүн. Дьиэ сыаната тугу баҕараргыттан, куорат хайа диэки кварталыттан, хас хостооҕуттан, иэниттэн тутулуктаах.  «Долевой» өҥө - кэрчиктээн төлөөһүн.

КРЕДИТ – диэн  хас эмэ сылга хабала. Ылбыт сууммаҥ сороҕор иккиттэн да элбэх төгүл элбиир.  КРЕДИККЭ киирэн судаарыстыбаны да, халыҥ харчылаах бааннары да байытыах кэриэтэ кыраны кыһалҕаҕа кубулуппакка, төһө кыалларынан, бэйэ көмөтүнэн харчы боппуруоһун быһаарбыт ордук диэн санаабын үллэһинним.

Хомпорууна,

"Кистэлэҥ күүс".