Дьон билэрин курдук, Спиридон Татаринов тус бэйэтинэн тугу-эмэ иҥэн-тоҥон хаһан, чинчийэн, кистэммити арыйан таһааран суруйбута суох.

Атын хаһыакка аахпытын, интернеккэ билбитин эрэ уонна ким тугу аҕалан биэрбитинэн суруйар үгэстээх.

Онто ити прокуратаҕа үҥсүүтүгэр да көстөр: «Наш конфиденциальный источник сообщил» диэн.

Арай сууттары кэрийэ сылдьааччы, ким туохха буруйдаммытын, ким хас сылга хаайыыга барбытын ис-иһиттэн имэҥирэн туран суруйар.

Ол аата, министр Артемьев туһунан ким эмэ («конфиденциальный источник») аҕалан биэрбитигэр олоҕуран, прокуратураҕа үҥсүү суруйдаҕа дии.

Дьэ манна кэлэн, Татариновка ити Артемьев туһунан ким сипсийбитэ буолуой диэн боппуруос үөскүүр.

Уонна тоҕо прокуратура оччо өрө көтө түһээт, хасыһан киирэн барда?

Оннооҕор буолуох үҥсүү прокуратураҕа киирээччи да — тарбанан да көрбөттөр диэн элбэх киһи кэпсиир, суруйар дии.

Оттон саҥа үлэтин саҕалаабыт министри утары прокуратуралар ол туох буолан, халбаһыы сытын ылбыт ыттар курдук ойон турдулар? Эбэтэр улахан кыахтаах хонтуора дьонун үлэлэрэ дуу?

Дьыала тэрийэргэ официальнай үҥсүү киириэхтээх буолан, ити «Батас» тэрилтэни туһаннылар дуу?

Артемьев дипломнара проблемнайдар диэн аммалар өссө 2008 сыллаахха билбиттэрэ дэһэллэр. Онон аммалар министри утары үлэлээбиттэрэ буолуо дуо?

Эмиэ да киһи мунаарар, аммалар ама да прокуратураны талбыттарынан хамсатар оччо кыахтаахтара буолуо дуо диэн.

Прокуратура харса суох үлэлээбит эбит, атын коррупционердары көрдүүр үлэлэрин долбуурга ууран баран, Артемьев тоҥ суолун сонордоон, ир суолун ирдээн киирэн барбыттар.

Суруйсуу бөҕө буолбуттар, хасыһыы кытаанаҕа саҕаламмыт.

Татаринов бэйэтэ суруйбутунан: «Как мне объяснили в прокуратуре, они делали запросы в Иркутский институт сельского хозяйства и в Рособрнадзор. Была долгая переписка. Еще проводили изучение архивных документов в ЯГСХА. Одно личное дело Артемьева сгорело, но второе нашли».

Ол сындалҕаннаах үлэлэрин түмгүн прокуратуралар Татариновка ыыппыттар.

Бэйэтин үҥсүүтүгэр Татаринов «Ответ. секретарь комитета противодействия коррупции «Батас» диэммин диэбит.

Оттон прокуратура суругар «Участнику Региональной общественной организации по противодействию должностным преступлениям и коррупции в Якутии «Батас» диэн буолбут. Дьикти соҕус. Прокуратуралар ол «Батас» комитет толору аатын Татариновтааҕар ордук билэллэр эбит дуу? Ол аата, прокуратураларга атын ким-эмэ сорудахтаабыт дуу?

Прокуратура суругун тутаат, Татаринов суруйбут: «Комитет "Батас" постановил проводить у Дома правительства № 1 одиночные пикеты с требованием отправить министра Артемьева в отставку. Пикеты будут проходить ежедневно, до тех пор, пока соответствующий указ не будет опубликован».

Ону баара, Александр Артемьевы ууратар туһунан Ыйаах илии баттаммыт буолан хаалбыт, онон пикекка турар Татариновы көрөр дьолтон дьон олоччу маппыт.

Артемьев дипломнара сыыһалаахтык оноһуллубуттарын аны ким да саарбахтаабат. Ол эрээри тыа сирин олоҕун кыһалҕаларын бэйэтин этинэн-хаанынан билбит, үлэтин трактористан саҕалаан, сыыйа өрө дабайан тахсан испит дьин норуот ортотуттан буһан-хатан тахсан испит салайааччы карьерата сарбыллан хаалбыта хайдаҕа буолла?

Артемьев дьыалатыгар санаа икки аҥыы хайдыһыыта баар:

- сорохтор үлэлиэ этэ, син таһаарыылаахтык хамсанан, дьаһайан испитэ, баҕар күттүөннээҕи ситиһиэ этэ дииллэр,

- атыттар дипломнара бутуурдаах буоллаҕына уураппыттара көнө дииллэр.

Оттон эһиги санааҕытыгар хайдаҕый? Спиридон Татаринов коррупционеры саралаабыт, бүтүн Россия үрдүнэн дуораһыйбыт атыыр айдааны тардыбыт герой? Эбэтэр хобуоччу дуу?

  ***

Николай Слепцов,

Дьокуускай к.