САХА норуота Дьөһөгөй Айыыны кытары быстыспат ситимнээхпитин төрүттэрбит Өлүөнэ очуостарыгар, Мэҥэ халлааҥҥа харбаспыт туруу хайаларыгар, сылгы мииммит киһини ойуулаан хаалларбыттара үйэлэри уҥуордаан билиҥҥээҥҥэ диэри кэрэһэлии турдаҕа. Өбүгэлэрбит сылгыны кытары алтыһан, араас дойду көстөр-көстүбэт моһоллорун иҥнибэккэ, этэҥҥэ туорааннар, күн-бүгүҥҥэ диэри сахалыы саҥабыт, Орто дойду үрдүнэн эҥсиллэн эрдэҕэ. Саха дьоно түҥ былыргыттан Дьөһөгөй оҕотун күөн туттан, араҥаччылаан, харыстаан баччаҥҥа диэри илдьэ кэллилэр.
Сылгы –миинэр миҥэ, көлүнэр көлө, эрэллээх доҕор. Маны таһынан саха киһитин кутун-сүрүн туппут, кэпсээҥҥэ киирбит оонньуубут – ат сүүрдүүтэ буолар! Быһымах, күлүмнэс түһүүлээх, сындааһыннаах уһун тыыннаах сүүрүк сылгылар уос номоҕо буолан көлүөнэттэн-көлүөнэҕэ кэрэ кэпсээн буолан тарҕаналлар. Хайа да кэмҥэ, хайа да судаарыстыбаннай тутулга олорбуппут и´ин ат сµµрдµµтэ Саха сиригэр симэлийбэтэҕэ, симэлийбэт, симэлийиэ да суоҕа...
Өрөспүүбүлүкэбитигэр ат сүүрдүүтүн далааһына, ыыра сыллата кэҥээн иһэр. Улуус-улуус ахсын ипподромнарга саас, сайын, күһүн үрдүк таһымнаахтык сүүрдүүлэр тэриллэллэрэ үтүө үгэскэ кубулуйда. Мэҥэ-Хаҥалас улууһун М.М. Сотников аатынан «Куоҥ-Харах» ипподромугар быйыл муус устар 2 күнүгэр өрөспүүбүлүкэ сүүрдүүтэ түһүлгэлэнэр. Сүүрдүүгэ саас сааһынан киирдэххэ маннык.Сааскы салгынынан сайа тыынан, оонньоон-көрүлээн барыҥ аар саарга аатырбыт «Куоҥ-Харах» ипподромугар! Бу интернет хаһыакка ким кэлэн сырсарын кулун тутар 30 күнүгэр биллэриэхпит!!!
***
Мэҥэ-Хаҥалас улууһун Ат спордун уонна сүүрдүүтүн федерациятын толорооччу дириэктэрэ Иннокентий АММОСОВ.