Афанасий Николаевич Максимов № 31 Чурапчы – Таатта уокуругуттан Ил Түмэн государственнай мунньаҕын депутата, Таатта улууһун тустууктарын туруорсууларын өйөөн, улууска көҥүл тустууну үрдүк таһымҥа таһаарар баҕаттан Федерация председателинэн 2005 сылтан талыллан үлэтин саҕалаабыта. Бастатан туран, Тааттаҕа тустуу инники өттүгэр сайдыытын, маассабаһын ситиһэргэ, хас биирдии нэһилиэктэртэн саҕалаан былааннаах үлэни ыытарга, материальнай базаны хаҥатарга, үлэ былаанын 2010 сылга тиийэ оҥорон, сыал-сорук туруоран, саҥа федерация састаабын талан үлэлээбитэ. Таатта улууһугар бастакы республиканский турниры Улуу Кыайыы 60 сылыгар анаан тэрийбитэ.Турнирга элбэх эдэр бөҕөстөрү тэҥэ Республика сүүмэрдэммит хамаандатын чилиэннэрэ кыттан күрэхтэһии таһымын үрдэппиттэрэ. Бу турниртан куорсун анньыммыт тустууктарбыт билигин даҕаны Сахабыт сирин ааттатан ситиһиилээхтик туста сылдьаллар.
Салгыы Аан дойду оҕолорго бастакы чемпиона Илларион Федосеев 55 сааһыгар, ССРС тыатын сирин спортсменнарын 3 төгүллээх, Баһылай Манчаары спартакиадатын маҥнайгы абсолютнай чемпиона Владимир Андросов 60 сааһыгар анаммыт Республиканскай турнирдары үрдүк таһымнаахтык тэрийэн ыыппыта, Таатта эдэр көлүөнэ тустууктара улахан түһүлгэлэргэ тахсалларыгар олук уурбута. Улуус эдэр бөҕөстөрө Республика иһигэр, Россия, норуоттар икки ардыларынааҕы таһымнаах турнирдарга күрэхтэһэ баралларыгар үгүс элбэх спонсорскай көмөнү оҥорбута.
2010 сылга ыыппыт үлэтин үрдүктүк сыаналаан, Афанасий Николаевиһы итэҕэйэн, иккис төгүлүн улууска көҥул тустуу федерациятын 5 сылга салайарга биир санаанан талбыттара.
Үлэтин-хамнаһын материальнай база сайдыытыгар, хас биирдии нэһилиэккэ тустуу тренера, хас биирдии нэһилиэк спортзалыгар тустуу көбүөрэ баар буоларыгар үлэлэспитэ. Былаан быһыытынан тустуу көбүөрүнэн Ытык-Күөл, Баайаҕа, Чычымах, Хара-Алдан, Кыйы нэһилиэктэрин спортзалларын хааччыйбыта. Ол түмүгэр улуус нэһилиэктэрэ спортивнай инвентардарынан толору хааччыллыбыттара.
Билиҥҥи уустук кэмҥэ улуус эдэр бөҕөстөрө күрэхтэһиилэргэ баралларын-кэлэллэрин чэпчэтээри УАЗ-микроавтобуһу булан биэрбитэ. Транспорынан хааччыллан эдэр тустууктар элбэх турнирдарга кытыннылар, маастарыстыбаларын үрдэттилэр, улуустарын чиэһин ситиһиилээхтик көмүскээтилэр.
Ахсынньы 12 күнүгэр 2011 сылга Дьукуускай куорат суута Афанасий Николаевич Максимовка олус кытаанах бириигэбэри таһаарбытын, биһиги улуус тустууктара утарабыт. Республика Үрдүкү суута Максимов Афанасий Николаевич дьыалатын хаттаан көрөн сөптөөх түмүгү оҥоруо диэн бигэ эрэллээхпит.
Таатта тустууктара.