Тохсунньу 13 күнүгэр суруналыыстар сокуонунан күннүүр күннэрэ. Аһаҕас, аһаҕас аҥаардаах, сабыылаах, сабыылаах аҥаардаах көрсүһүүлэр, эҕэрдэһиилэр, илии тутуһуулар үгэннииллэр. Суруналыыс идэтэ обществоҕа наадатын тоһоҕолоон бэлиэтииллэр. Үчүгэй идэлээхпит. Үчүгэй.

Бу сылга Ил Дархан уонна правительство дьаһалтатын салайааччыта Юрий КУПРИЯНОВ официальнай уонна официальнайа суох сонуну тарҕатар хаһыаттар, агентстволар, телевидение  редактордарын ыҥыртаан “Сэттис халлааҥҥа” эбиэттэттэ. Кинини кытары солбуйааччыта, соторутааҥҥа диэри Ис политика департаменын салайбыт Михаил СЛЕПЦОВ, Ил Дархан саҥа пресс-сэкиритээрэ Стас ПЛАТОНОВ бааллар.

Остуол аһын арааһын атын сайтар сиһилии суруйдулар, меню састаабын Юрий Степанович бэйэтэ оҥорбут быһыылаах: хаана, тайаҕын этэ, кыһыллыбыт, буһарыллыбыт чыыра хайдах эрэ барыта бу күҥҥэ оһуоба анаммыт эбит. Амтана да амтаннаах.  Сатаан хааны кутар буоллаҕына, атыны да сатыыра саарбахтаммат.

Кэм да кэтэх мэйии олоруутунан “булгу бу быыбарга анаан тэриллибит эбиэт быһыылаах диэн “чап” гыннарбыкка - “олох оннук буолбатах” дэннэ. Бастаан Михаил СЛЕПЦОВ аккаастанна, онтон хойутаан кэлбит Юрий КУПРИЯНОВ  батынна.  

Эҕэрдэ истэн, аһаан-сиэн баран, баар батарбакка буола турар событиялары туоһулаһыы буолла.

Тыа хаһаайыстыбатын миниистирэ Артемьев диплома дьиҥнээх. Туох баар сыаната-ассыаҥката чахчы. Прокуратура сууттаһар түгэнигэр –  үөрэммитин туһунан сурук-бичик, докумуон хара баһаам.

Спорт миниистирэ Михаил Гуляев кандидатскай, докторскай диссертациялара эмиэ дьиҥнээхтэр. Икки улахан хамыыһыйаны баран көмүскээбит.

Норуот депутата Александр Дудников научнай үлэтин эмиэ күтүрүүр суруйуулар тахсыбыттарын суруналыыстар информация быһыытынан иһитиннэрдилэр.

Үөрэххэ сыһыаннаах диплом туһунан айдаан республика правительствотыгар үһүс төгүлүн таҕыста.

Бастаан Александр ПОДГОЛОВ “аатырбыта”. Онтон Николай ДЕГТЯРЕВ олох да үрдүк үөрэҕэ суоҕа биллибитэ. Аны бу Александр АРТЕМЬЕВ үөрэхтээҕэ-үөрэҕэ суоҕа ырытыллар. Үһүс төгүлүн улахан чиновниктар үөрэхтэрин айдаана тахсара тугу туоһулууруй? Кадровай политика департамена үлэтэ ситэтэ суоҕун туоһулуур дии саныыбыт.

***

Андрей МАРТЫНОВ былырыын “Саха сирэ” хаһыакка уһун-синньигэс интервью бөҕө биэрэ сатаабыта. Онно кадровай боппуруоска, кини салайар департамена, олохтоохтук сыһыаннаһарын, бэл, социальнай ситимҥэ контактарыттан саҕалаан кимниин-туохтуун бодоруһарыгар тиийэ үөрэтэллэрин эппитэ-тыыммыта. Уопсайынан, кадр сүүмэрэ үөһэнэн хараҥаччыны көтүппэттик, алларанан кутуйаҕы  аһардыбаттык тыйыстык ыытылларын кэпсээн үллэҥнэппитэ.

Буолаары буолан, миниистир дуоһунаһыгар ананар киһи уулуссаттан кэлбэтэ биллэр. Син урут ханна эрэ үлэлээбит, дьоннуун-сэргэлиин алтыспыт дьон ананаллар. Андрей МАРТЫНОВКА “бу киһи докумуонун толор” диэн үөһэттэн сорудах бэрилиннэ да, кини кандидат урут ханна үлэлии сылдьан туох айдааҥҥа дуу, туох быһылааҥҥа дуу түбэһэ сылдьыбытын, кимниин алтыспытын, кэлбитин-барбытын  барытын үөрэтиэхтээҕин ааһан,  бэлэм утары  “досьелаах “олоруохтааҕа буолуо эбээт. Саха сирэ кыра, дьоно аҕыйах, сирэй-сирэйгиттэн кэтиллэ сылдьаҕын.

Холобур, ити АРТЕМЬЕВ дипломун айдаана тахсаатын кытары докумуонунан саба тибэн тута уоту умулларан кэбиһиэхтээҕэ. Баһылыктарынан сурук суруйтаан күлүүгэ барбакка.

ДЕГТЯРЕВ олох да үрдүк үөрэҕэ суох эрээри Үлэ миниистиринэн ананан үлэ бөҕөтө буола сылдьыбыта. Куурсу барбыт уонна үрдүк үөрэх туһунан диплом уратытын Кадровай политика департамена ама билбэтэҕэ буолуо дуо?

***

Государственнай СМИ үбүлэнэр боппуруоһун чааһынай блогер Денис АДАМОВ  Чокуур ГАВРИЛЬЕВЫ, Петр ВАСИЛЬЕВЫ (“Сахамедиалары”) утары көрөн олорон  көтөхтө. Онуоха ГАВРИЛЬЕВ “ити харчы" аҥардас “Сахамедиаҕа” анамматын, улуус хаһыаттарыгар, телевидениеҕэ барарын санатта.

“Социальнай хайысханы сырдатарга граннар бааллар даҕаны,  100-түү эрэ тыһыынчалар,” – диэн Денис мыынна. Онно киирсиэхтэрин баҕаралларын этэр. Холобурга диэн, хаайыыттан тахсыбыт дьону үлэнэн хааччыйар үлэ хайдах барарын, дьон тоҕо бомж буоларын туһунан передача оҥоруохпутун баҕарабыт диэтэ. "Общак" онно харчы биэрбэтэ чахчы. Онон бюджеттэн ити сыалга ама соҕус үптээх грант баара эбитэ буоллар диир.

Барыбытын үүйэ-хаайа туппут боппуруос бэрилиннэ:

-       Юрий Степанович, Госдума быыбарын праймериһигэр кыттаҕын дуо?

Политик политик курдук хоруйдаата. Бэйэтэ баҕарбат, ол гынан баран наада тирээтэҕинэ, уопсай интэриэс туһугар кытын диэтэхтэринэ – кыттар. Быыбарга кытыннаҕына уонна... судургутук кыайар. Имнэннэ.

“Оксиэ!” – саҥа аллайыы.

“Саха сирин” сүрүн редактора Чокуур ГАВРИЛЬЕВ  суруналыыстарга ураты сомоҕолоһуу баарын бэлиэтээн тыл эттэ. “Оннук”, -   диэн баран “Аартык.ру”  “Якутия.Инфону” кытары сэргэстэһэн олорон муорустаах иһитин харсыһыннарда  уонна “Якутск вечернэй” хаһыаттыын бииргэ лифкэ киирэн айаннаатыбыт.

Тахсаары туран Михаил СЛЕПЦОВТАН: “А Глушко куда?” диэн ыйыппыппытыгар: “Суруйбуккут дии, суруйбуккут туолан иһэр буолбатах дуо?” – диэн күллэ.

Кырдьык, киһибит барбыт.  Аны сылы быһа “ыытан”  баран харыһыйыах курдук туттан-хаптан атын ыҥырыкка бардыбыт.

***

 Aartyk.Ru