Вьетнамҥа дьон бэйэ икки ардыгар олус иллээхтик олороллор, бэйэ-бэйэлэригэр истиҥник харыстабыллаахтык сыһыаннаһаллар эбит. Сэриитэ суох олорбуттара сүүрбэччэ сыл буолбут. Сэриигэ элбэх дьоннорун сүтэрбит буолан дьоннорун олус сыаналыыллар быһыылаах. Урбаанньыттарга наһаа чэпчэки усулуобуйа тэрийэллэр эбит. Нолуогу правительство чилиэттэрэ, президеннэрэ эрэ төлүүр эбит. Кредиттэрин бырыһыана олус кыра.

Тутуу, суол оҥоһуута бөҕө бара турар. Россия технологиятынан оҥоһуллубут суоллара син биир биһиги суолбутун курдук асфальтара көөрөттөр, хайыта барар, алдьанар эбит. Онон уопсай технологиябыт соччото суох быһыылаах. Бөх-сыыс диэн суох. Бөх хомуйарынан кырдьаҕас дьон дьарыктаналлар эбит. Тачкалаахтар, уулусса кытыытыгар мөһөөччүккэ хараллыбыт бөҕү хомуйан, тута суордунан араартаан  приемнай пууннарга туттаран харчы оҥостоллор эбит.

Куорат иһигэр ханна баҕарар массыына сырыыта чааска 40 км-тан тахсыа суохтаах. Сатыы киһи суолу ханан баҕарар туоруон сөп. Уулуссаны туоратарга анал полицейскайдар бааллар. Ол дьон 18.00 чааска диэри үлэлииллэр эбит. Киэһэ бэйэҥ туоруугун. Аргыый  аҕай суолу туоруу тураҕын, ким да харах быччайарынан көтүппэт, массыыналар бары тохтоон сатыы киһини аһардаллар.

***

Аартык.ру