Быйылгы Ыһыах Улуу Кыайыы 70 сыллаах үбүлүөйүгэр ананан, 1945 сыллаахха  Саха Сиригэр ыытыллыбыт Кыайыы Ыһыаҕын кытары ханыылыы тардан тэрилиннэ. Манна бочуоттаах ыалдьыттарынан сэрии, тыыл бэтэрээннэрэ, сэрии кыттыылаахтарын огдооболоро, сэрии оҕолоро, Ленинград блокадатын туоһулара кытыннылар.

Икки кун устата Үс Хатыҥ бары түһүлгэлэригэр араас хабааннаах 85 культурнай тэрээһиннэр ыытылыннылар. Маныаха, өрүү буоларын курдук, саха киһитэ ордук сэргээн “Дыгын Оонньууларын” уонна ат сүүрдүүтүн сэҥээрэн көрдө.

Ат сүүрдүүтэ сахаҕа былыр-былыргыттан улаханнык ытыгыланар, кэтэһиилээх-манаһыылаах күрэс былдьаһыыта буолар. Куоракка да үөскээбит ыччат, бэйэтэ да билбэтинэн, сылгы дьырылатан  кистиирин, туйаҕын тыаһын иһиттэҕинэ этин сааһа дырылаан барар. Хас эмэ тыһыынча сыллар тухары хааҥҥар иҥмит өйдөбүл кэтэххэр олорор буоллаҕа. Кырдьык - хааҥҥар диэн мээнэҕэ эппэттэр. Ол иһин ат сүүрдүүтэ билигин даҕаны умсугутуута уҕараабат, күөртэнэн күөдьүйэн тахсан иһэр.

Быйылгы Туймаада ыһыаҕын ат сүүрдүүтүгэр республика бары муннуктарыттан быһыйтан быһый, сымсаттан-сымса, бастыҥтан бастыҥ сүүрүк аттары аҕаллылар. Үс Хатыҥ 10 тыһыынчаттан тахса олорор миэстэлээх саҥа Дьөһөгөй  ипподромугар иллэҥ олбох суох буолла. Бастакы күннээҕи  ат сүүрдүүтэ Дьокуускай куорат баһылыгын бирииһигэр тэрилиннэ. Манна мустубут үгүс дьон ат сүүрдүүтүн аһыллар сиэригэр-туомугар  киин куорат баһылыга, республикаҕа ат сүүрдүүтүн спордун федерациятын Президенэ Айсен Николаев түһүлгэҕэ атынан киирбитин олус биһирии көрдө. Аныгы сыыдам сырыылаах 21-с үйэҕэ аныгы салайааччы  өбүгэ үгэһин ытыктаан, суолталаан, Дьөһөгөй оҕотун миинэн киирбитэ дьону-сэргэни улаханнык сэргэхситтэ,  сүргэтин көтөхтө. Киһи син биир бас-көс дьон туттарын-хаптарын кыраҕытык маныыр, сыана быһар. 

Ыһыахха, Саха сирин олохтоохторо эрэ буолбакка, атын сиртэн, судаарыстыбалартан элбэх ыҥырыылаах ыалдьыт кэлэн барда. Ипподромҥа кэлбит ыалдьыттар куорат баһылыга атынан киирбитин көрөн - сахалар салайааччыларыгар тиийэ чахчы даҕаны норуот үтүө үгэһин, культууратын, историятын эттэригэр-хааннарыгар иҥэринэ сылдьалларын, ытыктыылларын, билинэллэрин илэ харахтарынан көрөн сөҕөн-махтайан бардылар.  

Ньургустана ИВАНОВА,
Дьокуускай к.