Айсен Николаев Дьокуускайга Сталин памятнигын утарбат?

Вторник, 17 Января 2012 02:31
Оцените материал
(0 голосов)

Аны саас мээр быыбарыгар кыттыахтаах кандидаттар куолас сүүйэр туһугар хамсаныы-имсэнии бөҕөтүн таһааран эрэллэр. Урбаанньыт, дьокутаат Владимир Федоров быыбар ининнээҕи «аҕытаассыйатын» ыыппыта хас да сыл буолла. Миэбэл-салон «Виктория» атыылааһааччылара былыр үйэҕэ пааспардарын дааннайдара кандидат Федоров хасааһыгар киирбиттэрэ быданнаабыт буолуохтаах.

Оттон Айсен Николаев, өрөспүүбүлүкэ правительствотын бэрэстээтэлин бастакы солбуйааччыта, бүгүҥҥүттэн уоппускаҕа баран, быыбар ининнээҕи көрсүһүүлэрин дьэ саҕалаабыт. Уонна бастакы көрсүһүүтүн сэрии, тыыл бэтэрээннэриттэн саҕалаабыт. Биллэн турар, кырдьаҕас дьон туруорсуулара элбэх. «Михальчук барахсан «Арчы» курдук үчүгэй киини бэлэхтээбитин тэҥэ, эн эмиэ Айсен Сергеевич маннык хабааннаах дьиэтэ тутан ааккын ааттатарыҥ буоллар. Холобур, Оһуохай дьиэтэ наада этэ», - диэн оһуохайдьыт кырдьаҕастар баҕаларын  эттилэр.

Бэтэрээннэр урукку баһылык Юрий Заболевы сөбүлээбэт биир улахан төрүөттэрэ – Улуу кыайыыны уһансыбыт Иосиф Сталиҥҥа памятнигы туруорары боппутугар сытар. Билигин түгэн тосхойбучча бу боппуруос эмиэ көтөҕүлүннэ. «ДОСААФ таһыгар Сталин памятнига турарын мин урут да утарбат этим, билигин да утарбаппын», - диэн Айсен Николаев этиитин оҕонньоттор ытыс таһынан көрүстүлэр. Эдэр соҕус дьон бастарын быһа илгистээччилэр эмиэ көһүннүлэр. «Лениҥҥэ памятник турар эбээт, куорат хаба ортотугар, Сталиҥҥа да турара тоҕо омнуоланарый? Биһиэхэ Сталин олорбут олохпут, идиэйэбит символа буоллаҕа, бэйэбит да аҕыйаан сылдьар дьону убаастыахха, тылбытын ылыныахтарын сөбө», - диэн бэтэрээннэр бэркиһииллэр.

Биллэн турар, суол-иис, уу-хаар түһэр боппуруостарын дьон көтөхтө. Сир тыырылларыгар куорат аттынааҕы бөһүөлэктэргэ эмиэ квота бэриллиэхтээх диэн хатастар туруорустулар. Уопсайынан, мээнэ, ойуур иһигэр учаастактары биэрэри бобору,тыырыллар  сир уотун-күөһүн киллэрэргэ, суолун-ииһин оҥорорго дьаһалта көмөлөһүөхтээх диэн эттилэр.

«Президент Егор Борисов кырыйдаҕына сатыы хаамарын ордоруо» диэн сылыктааһынтан саҕалаан, Василий Тарскай автобус тохтобулларын сөргүтүөххэ баара диэн баҕа санаатын тиэртэ. Василий Иванович Ил Түмэн дьокутааттарын аҕыйатарга эмиэ туруоруста. «35-кэ диэри аччатыахха. Билигин 70-ча дьокутааты таһар массыына сыаната, суоппар хамнаһа, сэкиритээрдэрин, көмөлөһөөччүлэрин хамнастара – бюджекка орускуот. Телевизорга бу дьон утуктуу олороллорун көрдөрөллөр», - диэн кыйаханна. Куорат баһылыга Ил Түмэн дьокутааттарын баҕас хайдах дьаһайар үһү да буоллар, Айсен Николаев кырдьаҕас этиитин ымыр да гыммакка истэн олордо.

Марха кырдьаҕаһа Н.А.Томскай баһылыкка баҕалаах элбэх эрээри, кыайар киһи аҕыйах диэн этиитин кытары сөбүлэһиэххэ сөптөөх . Билиҥҥи туругунан, 10 киһи мээр кириэһилэтигэр дураһыйарын биллэрдэ. Олортон дьиҥнээхтик киин куораты салайар уонна кылаабынайа сайыннарар кыахтаах киһи, арааһа быстар аҕыйыах буолуо ээ.

Добавить комментарий

Защитный код
Обновить

Aartyk.ru