Бүлүү өрүс күнүн олохтууру улуустааҕы Общественнай Сүбэ көҕүлээбитэ. “Саас хаар ууллаатын кытары нэһилиэк олохтоохторо Эбэбит кытылын тахсан  ыраастаан, уулуссаларын, тиэргэннэрин бэрийэн субботниктары тэрийбиттэрэ, - диэн улуустааҕы Култуура уонна спорт департаменын салайааччыа Таисия СИМЕОНОВА “Аартык.ру” интернет-таһаарыыга кэпсиир. – Бүлүү Эбэ күнүн көрсө уһуйаантан, оскуолаттан саҕалаан кырдьаҕас дьоҥҥо тиийэ араас күрэхтэһиилэр биллэриллибиттэрэ. Уруһуй, ырыа, хоһоон,тойук, үҥкүү тыла,  өйтөн суруйуу  күрэхтэһиилэригэр элбэх үлэ киирдэ”.

Таисия Владимировна этэринэн, бу бэлиэ күн, бастатан туран, экологическай култуураҕа дьону, ыччаты иитии буолар: “Бүлүүтээҕи ГЭС, алмаас тэрилтэлэрэ, ракета тобоҕо түһэрэ эрэ буолбакка, иитэн-аһатан олорор Эбэбитин биһиги бэйэбит эмиэ киртитэбит. Бөх-сыыс, кир-хох өрүскэ суураллан түһэ турар. Араас кирдээх уу кутуллар, тоҕуллар. Хас биирдии өрүһү кыйа олорор нэһилиэк дьоно экологическай култуураларын үрдэтэр туһугар бу Күн олохтонно”, - диир.

Сасын Үөһээ Бүлүүгэ эрдэ биллэрилибит куонкурстары таһынан, библиотекалар күүстэринэн араас быыстапкалар тэриллиэхтэрэ. Бүлүү өрүс туһунан урукку уонна саҥа  ырыалар ылланыахтара. Гитара доҕуһуоллаах ырыа айааччылар күрэстэһиилэрэ тэриллиэҕэ, ону таһынан “Сандаара Куо” диэн кэрэ кыргыттар  күрэхтэһиилэрэ ыытыллыаҕа.

Үөһээ бүлүүлэр Бүлүү Эбэҕэ сүгүрүйэр кэрэ-бэлиэ күнү атааран баран, бэс ыйын 24-25 күннэригэр үргүлдьу самаан сайыны айхаллаан, Айыыларга алгыс тылын анаан ыһыах ыһыахтара.   

***

Василиса ГАВРИЛЬЕВА,
“Аартык.ру”

Хаартыскаҕа: Аҕа дойду улуу сэриитин кыттыылааҕа, скульптор Анисим ПРОКОПЬЕВ оҥорбут  “Бүлүү Эбэ Хотун” монумена.