Быыбар биир саамай күүстээх кандидатынан ааттанар, өрөспүүбүлүкэ  правительствотын бэрэссэдээтэлин бастакы солбуйааччыта Айсен Николаев бу күн сокуон өттүнэн быыбарга киирсэр толору бырааптанна. Кини ТИКкэ докумуонун бу күн иннинэ туттарбыта биллэр.

 Оттон быыбарга кини сүрүн утарылаһааччыларыттан биирдэстэрэ - Анатолий Кырджагасов дастабырыанньатын тохсунньу 6 күнүгэр туппута.

Бу дьон иккиэн Үөһээ Бүлүүттэн төрүттээхтэр. Анатолий Андреевич даҕаны, Айсен Сергеевич даҕаны иккиэн аатырбыт Үөһээ Бүлүүтээҕи физмат оскуоланы ситиһиилээхтик бүтэрбит дьон. Иккиэн Москубаҕа үөрэммиттэр. Биирдэрэ Москубатааҕы энергетикэ институтун, иккиһэ Москубатааҕы судаарыстыбаннай университеты бүтэрбиттэр. Кырджагасов 1964 сыллааҕы төрүөх, оттон Николаев 1972 сыллаахха төрөөбүт. Иккиэн кыһын төрөөбүттэр. Олунньу 23 күнүгэр Кырджагасов, оттон тохсунньу 22 күнүгэр Николаев төрөөбүт күннэрин бэлиэтиэхтэрэ.