Быыбар тиһэх түһүмэҕэр. Ол иһин киирсии сытыырхайда. Быйылгы быыбар уратыта диэн социальнай ситимнэри лаппа туһаннылар. Чуолкайдаан эттэххэ, биир штаб туһанан олус диэн үчүгэйдик үлэлии олорор.

Ватсап диэн ааттанар социальнай кэпсэтии нөҥүө араас сурах-садьык бөҕө дэлэйдэ. Мин көрдөхпүнэ наар Дьөгүөр Барыыһабы хоруотааччы элбэх. Олоҕо суох сонуннартан сороҕор киһи да сонньуйан ылар. Холобура, Путин кэлэн барбытын кэннэ Дьөгүөр Барыыһабы кини аанньа ахтыбакка аттыгар да туруорбатаҕын туһунан, атын президеннэри кытта дойдубут баһылыга куустуһа сылдьыбытын туһунан эҥин араас хаартыскалары ыытыы дэлэйдэ. Оттон бу хаартыскалары көрөн олорон өйдүүр киһи,  бу манныгы оҥорон тарҕатар дьон  быыбардааччылары наһаа да сэнииллэр диэн санааҕа кэлэр. Итини ылынарбытын билэн оҥорор буоллахтара дии. «Таайдарбыт» оннооҕор буолуох аан дойдуну айбардыы олорор дьон буоллаҕа эбээт. Партияларыгар «таайдар» көмөлөһөллөрө баа буолуо дуо? Өссө төһө эрэ күлэллэр: «Съели и не подавились» диэн.

Били хаартыскаларыгар Рамзан Кадыров Путинныын куустуһан турарын ыыппыттар. Урукку хаартыска.  Чечня айдаанын саҕанааҕы кэм. Кэмэ да, балаһыанньата да ол сахха букатын атын этэ. Оччолорго Путины ханнык да омук дойдута сойуоласпат, кимиэхэ да куттала суох государство салайааччыта этэ буоллаҕа. Онно кини хайдах баҕарар аһаҕастык айанныыр, сылдьар, туттар-хаптар кэмэ этэ. Оттон билигин? Аан дойдуну айбардыы олороору Америка, Европа, бэйэбит да олигархтарбыт Путин олоҕор суоһууллара улахан. Тойоммут харабыллара кими да аттыгар чугаһаппаттара чахчы. Кини кэлиэн иннинэ ханна тиийэр сиригэр ый инниттэн улахан бэлэмнэнии ыытыллар. Ол мээнэҕэ буолбатаҕа сэрэйиллэр. Дьокуускайга бүтүн биир самолет киһи кэлэн куттала суох буолууга үлэлээбитин туһунан Ватсапка баара. Путин билигин снайперскай бинтиэпкэ анныгар олорор диэн суруйаллар эбээт, Интернеккэ. Буола турар балаһыанньаны өйдүү сатаабыт киһи өйдүөн сөп. Кеннеди быстах дьылҕата даҕаны элбэх санааҕа тиэрдиэн сөп. Кинини харабыллара харыс да хаалларбакка, түөрт өттүттэн кими да чугаһаппакка кэтии-маныы сылдьалларын көрдүбүт. Бэл президени илэ харахтарынан көрөөрү болуоссакка мустубут боростуой дьоҥҥо, Путин иннилэригэр буолбакка бэрт түргэнник ойоҕосторуттан тохтоон кыл мүччү тахсан илии тутуһан ааста.

Мин санаабар, Дьөгүөр Барыыһап штабын үлэһиттэрэ мөлтөх буолан манна эҥин араас сурах тарҕанарыгар олук оҕустулар. Мөлтөх политтехнологтар эбит.

Аны Барыыһап Саха сирин «атыылаабытын», гастарбайтердары, Украина дьонун бэйэтэ ыҥыран аҕалан «олохтуу сатыырын» курдук араас омуннаах кэпсээн, сурах-садьык, видео матырыйаал элбэх. Маны утары Ватсапка эмиэ туох да суох. Сонуннары киэҥник тарҕатар официальнай улахан тэрилтэлэр информацияларын ыччат аахпат. Кини Ватсапка, Интеренеккэ  олорор. Уонна ону барытын биэс харчы курдук итэҕэйэр. Кинилэргэ анаан аҥардас эмоцияҕа оҕустарар сыаллаах араас сымыйа информацияны сахалыы-нууччалыы ыытыыга үлэлиир политтехнологтары утары Барыыһап штаба Ватсабы туһаммата дьикти. Сороҕор Барыыһап штабыгар таҥнарыахсыттар эрэ мустубуттар дуу диэн саныаххар диэри.  Баҕар, ол политтехнологтарбыт номнуо атыыланан баран олороллор дуу? Уонна атыннык хайдах саныахха сөбүй?! Бу көстөн турар үрүҥү хара, хараны үрүҥ диир информациялары утары ыччакка өйдөтүү үлэтин ыыппат буоллахтарына!

  ***
Наталья Игнатьева, быыбардааччы.