Арҕаа дойдулартан, АХШттан кыра бырыһыаҥҥа кредит ылан баран, россияннарга улахан бырыһыаҥҥа иэстээн, ол бырыһыан араастаһыытыгар тото-хана үлэлээбит бааннар дьылҕалара уустугурда.

Биллэрин курдук, Евросоюз Россияны утары санкциятын иккис түһүмэҕэр - РФ бааннарыгар арҕаа дойдулар кредит биэрэллэрин  боппута.  Улахан бааннар бары омук дойдуларыттан кыра бырыһыаҥҥа харчы иэс ыла олорбуттара.
Элбэх харчыта суох боростуой дьон бу санкцияҕа кычыгаланыахпыт суоҕа дии санаабыппыт баара, хайдах эрэ буолаары гынна быһыылаах. Маныаха "Аартык.ру" экспертэртэн, баан үлэһиттэриттэн комментарий ылла:
- Сыл түмүгүнэн статистика мөлтөһүөр. Сбербаан, Газпромбаан, ВТБ онтон да атын бааннар бары арҕааттан ылбыт кредиттэрин сыл түмүгэр төлүөхтээхтэр. Урут саҥа кредит суотугар урукку кредиттэрин төлүү олорбуттара. Билигин ол табыллыбат буолла. Улахан кээмэйинэн ньиэп бородууктатын - бензини, уматыгы, дьон туттар аһын-таҥаһын, малын атыылаһар тэрилтэлэр улахан моһолу көрсөн эрэллэр. Тоҕо диэтэххэ урут поставщиктар төлөбүрү тута буолбакка, бүтүн сылга тардан, уһатан-кэҥэтэн төлөттөрөллөр этэ.  Билигин тута барытын аахсары ирдээн эрэллэр. Бааннар кыра да дьиэктээх тэрилтэлэргэ, биирдиилээн дьоҥҥо кредит  биэрбэт, аккаастыыр буоллулар. 
Маннык балаһыанньаҕа бааннар ис ырыынакка харчы көрдүүр түбүктэниэхтэрэ. Ууруу харчы бырыһыанын үрдэтэн эрэллэр. Ситинтэн сиэттэрэн, биэрэр кредиттэрин бырыһыана өссө үрдүөҕэ. Биир өттүнэн, дьон үксэ хамнастан хамнаска олорор, бааҥҥа уурар харчылаах дьон аҕыйах. Аныгыс сылтан саҕалаан элбэх баан эстэрэ буолуо, - диэн финансистар сабаҕалыыллар.
***
Манан диэн эттэххэ, Саха сиригэр үлэлиир бааннар дьылҕалара эмиэ уустук. Биллэрин курдук, баан эйгэтигэр элбэх саха ыччата үлэлиир. Бу ыччат сотору штат сарбыйыытыгар эмиэ түбэһэр кутталлаах. Бааннар топ-менеджердэрэ эмиэ үлэлиир сирдэрин уларытан эрэллэр. Холобур, АТБ баан Саха сиринээҕи управляющайа Анжелика АКИМОВА урут банкир буолан үүнэн тахсыбыт "Алмаасэргиэнбааныгар" төттөрү барбыт. АКИМОВА "АЭБ" управляющайын 1-кы солбуйааччытынан анаммыт.
***
Итини таһынан, Дьокуускай куорат дьаһалтата  "Всемирный банк реконструкции и развития" американскай баантан кредит ылан дьыссааттары, оскуолалары тутуохтааҕа. Билиҥҥитэ, бу санкция иннинэ түһэрсиллибит дуогабардар харчылара эмиэ хамсаабакка хараҕаланан сытан эрэр. Онон киин куорат тутуутугар ылыллыахтаах кредит дьылҕата эмиэ салгыҥҥа ыйанан хаалла. 
***
Аартык.ру