Биһиги урааҥхайдар, бур-буруо таһаараммыт улуу нуучча норуотун кытта биир тылы буламмыт олус иллээхтик биир ыал буолан олорбуппут сыл-хонук дииллэринии хайы-сах түөрт үйэ буола охсубут. Ол тухары эйиэнэ-миэнэ дэспэккэ, эн сахаҕын гынан баран бырааккын, эн нууччаҕын гынан баран убайгын, сыччах тус-туһунан омук буоларбытын бэйэ икки ардыгар арахсыбакка олус үчүгэйдик олоробут, олорбуппут, олоруохпут даҕаны. Дьэ уонна диэххэ...

Кэнники аҕыйах сыл иһигэр олус элбэх партия үөскээн кыра мэйиилээх киһи буккуллар дьаабыта үөскээбитин туһанан сорох политиктарбыт олус хамаҕатык туһанан эрэллэриттэн киһи эрэ сөҕөр. Хойут соҕус биир саһаан үрдүктээх Михаил Прохоров диэн олус баай, харчыта наһаа элбэҕиттэн политикаҕа сыыйа-баайа сыҕарыйан "Гражданская платформа" диэн партия тэрийэн үлэлээн эрэрэ биллэр. Биһиги тапталлаах Сахабыт Сиригэр эмиэ ол партия олоххо көрүүтүн сөбүлээн хас да киһи партияҕа киирбиттэрин ааһан Саха сиринээҕи салаа тэрийбиттэрэ. Бу партияҕа дьоҥҥо биллэр-көстөр дьоннор эмиэ бааллар.

Михаил Прохоров Саха сиригэр кыһыл көмүс хостооһунунан дьарыктанар тэрилтэлэри барытын кэриэтин бас билэр. Онтон эбитэ буолуо, бу дойдуга олохтоох омук баарын тухары ол дьоҥҥо тугу эмэтэ төлүөххэ наада онтон хайдах гынаммын быыһанар суолу тобулабын диэн уодаһыннаах санаанан бу элбэҕэ суох омуктары атын улахан регионнарга холбооммун бөдөҥсүтүү политикатын ыытабын диэн улахан ыйытыкка сылдьыбытын биһиги "бэйэбит уолаттарбыт" бэйэлэринэн тиийэн биэрдилэр уонна: "туох нааданый, биһиги оҥоруохпут" диэн чорбойдулар.

Итинэн сиэттэрэн суруйдахха, урукку баайдарбыт хаһаахтар ыраахтааҕы түһээнэ хомуйа сырыттахтарына: "биһиги хомуйуохпут, биһиэхэ аҕалыҥ" диэн ылан баран биэс солкуобай оннугар, уону хомуйбуттарын түмүгэр, норуоту эһэ сыспыттара.

Оччотугар билиҥҥи быыбарга "Гражданская платформа" партияттан турбут Эрнст Березкин норуотун көмүскүөн билиминэ, олигарх Прохоров халыҥ хапытаала Саха сирин норуоттарын баайын апчарыйарыгар үлэлиэхтээх, иэдээн диэтэҕиҥ...

Бу "маскарааттаах дьоммут" инникитин Сахабыт сирин Унитарнай судаарыстыба оҥороору сүүрэ-көтө, аҕылыы-мэҥилии сылдьаллара тахсан кэлэр.Быһаара таарыйа суруйдахха унитарнай судаарыстыба иһигэр биир даҕаны биһиги республикабыт курдук судаарыстыбаннай суолталаах омук анал туруктаах субъект суох буолар, ону өйдүөххүтүн наада күндү бар-дьонум, урааҥхайдар!

Билиҥҥи курдук талбыппытынан чалҕарыйбыппыт суох буолар, билиҥҥи курдук сирбиппитин киэр анньан, талбыппыттын талан ыларбыт суох буолар."Мүөттээх" тылларын истэммит, саһыл суортан сыырын мүлчү туттарбытын курдук прохоровтар, абрамовичтар, потаниннар аһылыктара буолумуоххайыҥ!
ххх
Эрнст Максимов,
Дьтокуускай к.