"2008 сылтан бу сылга диэри 29 тэрилтэ моҥкурууттаабыт, иэһэ-күүһэ мунньуллан баран салгыҥҥа ыйанан хаалбыт. Подласенко солбуйааччыта этэринэн,  кэмигэр хамнас биэрбэккэ 100 тэрилтэ прокуратура бэрэбиэркэтигэр түбэспиттэр. РФ генеральнай прокурорун Ю.Чайка солбуйааччыта Юрий ГУЛЯГИН "уопсайынан Саха сиригэр хамнас төлөнөрө уустук" диэн маннааҕы прокурор кэпсээнин ыпсаран биэрбит. Кини этэринэн, сыл саҕаланарыгар хамнаска иэс  9,6 мөл. солк. эбит, онтон сыл аҥаарыгар ол иэс 61,1 мөл. диэри үллүбүт. Инньэ гынан, Генпрокуратура хамнаска иэстээх тэрилтэлэргэ тиһэх сэрэтии ыыппыт. Ыытарын ыыппыт да, холобур, Күндээдэтээҕи АПК  (Ньурба улууһа) үлэһиттэригэр хамнас төлөөбөтөҕө быданнаата. Ол төрүөтэ диэн кыс устата мөлтөх оттон, астан биир-биир  сүөһү өлүтэлээн испит. Ити ханнык баҕарар сүөһүнү көрөр хаһаайыстыбаҕа тахсар дьыала. Улуус прокуратурата ону билэн баран АПКаны бэрэбиэркэлии тахсар уонна хас эмэ бүк суумаҕа ыстарааптаан кэбиһэр. Онон счеттарыгар түспүт харчыны барытын федеральнай бюджет туһатыгар суйдаан ыла олороллор. Ол түмүгэр хантан харчыланан хамнас төлүөхтэрэй: хамнас суох. Онон тыа хаһаайыстыбаларыгар генпрокуратура "тиһэх сэрэтиитэ" балаһыанньаны уларытар кыаҕа суох. 
***
Промышленноска, тутууга  киирдэххэ атын. Ол сүөһү көрөөччүлэр хамнастара дуу, тутуу харчыта дуу. 
Бу сааскыттан ыла "Трансстрой" тэрилтэ сүгүннээбэтэ. Олигарх Дерипаска бас билэр хампаанньаата, маннааҕы салаатын Александр ДУДНИКОВ, Ил Түмэн дьокутаата салайан кэлбитэ. ДУДНИКОВ тимир суол тутуутугар олохтоох тутуу тэрилтэлэрин олорчу эстэ диэн хаста да суруйан турабыт. Ол бэйэтэ билигин сенаторга кандидаттыы сатыы сылдьара олуона соҕустук иһиллэр. Атаһа-доҕоро ШИМОХИН хаһыс да төгүлүн "Саха сирин тимир суолун" АК генеральнай дириэктэринэн ананна. Бу икки доҕоттор Алдаҥҥа, Томмокко тимир суолунан таһаҕас таһары хонтуруоллаан, онтон үлүгэр ас таһаарына олороллорун туһунан эмиэ истэбит.
РФ вице-премьер миниистирэ "Трансстрой" иэһигэр анал хамыыһыйата тэрийиҥ диэн маннааҕы правительствоны сорудахтаабыта үс ый ааста. Баччааҥҥа диэри хамыыһыйа тэриллэн эрэрин дуу, тэриллэ сатыырын дуу туһанан сураҕы Афанасий Егоров (президент, правительство пресс-сулууспата) тарҕата илик, "Якутия", "Саха сирэ" хаһыат сонун бэчээттии илик. Арай, кэпсэл нөҥүө ДУДНИКОВ остуолугар кирпииччэ уораҕайтан "бу биэс киһиэхэ иэскин булгуччу төлөө" диэн испииһэк киирбитэ баара. 
Генеральнай дириэктэр А.ДУДНИКОВ ( "Еловское-Транстрой" ХЭТ) хамнаска иэһэ, прокуратура даннайынан, 30 мөл. эбит.  Бу киһини прокурордар доппуруоска ыҥыра сатаабыттар да, кэлэн бэрт. Онон ДУДНИКОВ прокуратура "кыраҕы хараҕын" кэтэбилигэр киирбит уонна ГУЛЯГИН эппитинэн ыстарааптаныахтаах үһү.
Прокуратура быыбар саҕана "сенатордыы барыахтаах" киһини "кыраҕы кэтэбилгэ" ылбыта эмиэ биир дьикти, республика хамнаска иэһин улахан СМИга таһаарбыта эмиэ биир бэйэтэ туспа түгэхтээх сонун. 
***
Аартык.ру