Уос номоҕор киирэр күүстээх, быһый буоларга айылҕа бэрсибитин сайыннарыахха наада. Талааҥҥар эбии элбэхтик ийэ-хара көлөһүҥҥүн тохтоххуна эрэ спорт Олимпын дабайыахха сөп. Нэһилиэк ыһыаҕар да кыттааччылар син- биир спорка сыһыаннаах дьон буоланнар биһигини үөрдэллэр-көтүтэллэр.

Онтон дьон кутун-сүрүн тутар ырыаһыт буолуохха диэтэххэ, көһөҥө талаан хайаатар да наада. Ол талааны айылҕа бэркэ кэмчилээн биэрэрин билэбит. Ол эрээри остуол ырыаһыта да киһи, дьоҕурдаах эрэ буоллаҕына, дьон иннигэр тахсар.

Киһи уйулҕатын уйадытар улуу музыкант диэн биһиги ортобутугар таҥараҕа тиксэр кэриэтэ аҕыйах. Онтон күннээҕи олоххо баар музыканнар да, үлэлэрин дьоҕура суох киһи оҥорбот. 

Дьэ ити курдук үҥкүүһүттэр, иистэнньэҥнэр, уруһуйдьуттар, скульптордар, артыыстар онтон да атын идэлээхтэргэ тугу эрэ айалларыгар талаан, кырата дьоҕур ирдэнэр. Оттон дуоһунаска олорон дьону салайыы диэн туспа эйгэҕэ талаан, кырата дьоҕур ирдэниэхтээх дуо?
Киһи-аймах историята көрдөрөрүнэн, улуу салайааччылар бааллара, бааллар уонна баар буола да туруохтара. Ол аата эмиэ салайар талаан баар буолуохтаах дииллэрэ сөптөөх эбит.

Оттон билигин олоххо кэтээн көрдөххө, саамай дьоҕур, талаан наадата суох хайысхатынан дуоһунаска тиксии буолла быһыылаах. "Дуоһунаска тиксии - ол аата судаарыстыбаннай харчыны айбардыырга көҥүлү ылыы" диэн түктэри өйдөбүл киэҥник тарҕанна. биир да салайааччы ол туһунан билиниэ суоҕа да буоллар, дьону албыннаабаккын. "Улахан уопсай бөрүөктэн" бэйэтин өлүүтүн- чааһын ылар баһаам баҕа дьон өйүн- санаатын ытыйахтыы эргитэр.

Хас биирдии да, улуус да, куорат да буоллун, дьону сатаан салайбат, харизматичнайа суох сиэрэй маасса - бүтүннүү дуоһунаска талаһарын көрө-көрө киһи сонньуйар. Тула өттүгүтүн өйдөөн көрүҥ эрэ. Этэргэ дылы, салайар талаан да, дьоҕур да ханан да сыстыбатах дьоно дьокутаат, салайааччы буоларга туох баар АЛБАСТАРЫН ууран, ийэ-хара көлөһүннэрэ тохтор.  Туох иһин? Эн биһикки үчүгэйдик олорорбут туһугар үлэлээри дуо? Эбэтэр бүтүн норуот кулута буолаары дуу? Баҕар, дьоҥҥо-норуокка үтүө салайааччы этэ диэн кэпсэлгэ киирээри?.. ...Олус саарбах санаалар. Дуоһунаска олорор уонна талаһар киһи хараҕын өйдөөн көрөөрүҥ эрэ... халтархай, халбархай, албын-көлдьүн, сымыйа, ньуолбар буолуу салгына саба биэриэ.
...Ылар-биэрэр суох.
***

Бүөтүр АРЫЫЛААХАП,
Дьокуускай к.