Киһи да сонньуйар. Онто да аҕыйах ахсааннаах норуоту «тырыта тыытыы» туохха тиэрдэрэ биллибэт.
Ааҕааччылар өйдүүр буолуохтаахтар. Аптека диэни билбэтэх түгэх нэһилиэктэр эмтэринэн-томторунан хааччыллыылара соторутааҥҥа диэри быстар мөлтөх этэ. «Сиэрдээх Арассыыйалар», чуолаан Госдума дьокутаата Федот Тумусов туруорсуутунан, эми атыылыыр көҥүл акушер-фельдшер пууннарга бэриллибитэ. (Урут аптекаларга эрэ эми атыылыыр лицензия баара). Компромат.ру суруйарынан, дьэ бу биэлсэрдэрбит таһынан, «Федот Тумусов бас билэр «Томмедфарм» аптека ситимин үлэһиттэрэ» тыалары кэрийэ сылдьан дезоморфиннаах таблеткалары «хото» атыылыыллар үһү. Ону сэргэ, интернет-суруналыыстары илдьэ рейдэ оҥорбуттар. Соруйан дьүдьэх эдэр дьону хомуйан баран, чуолаан «Томмедфарм» аптекаларын кэрийтэрбиттэр. «Тумууһап аптекалара» бары псевдо-наркоманнарга «Кодилак», «Пенталгин» эмтэри харыыта суох атыылаабыттар. Ити эмтэртэн түҥ тыа олохтооҕо дехоморфины хайдах ыларын «билэр» буоллаҕына, куорат дьоно «ааһан иһэн» наркотигын араарар буоллахпыт.
Тумууһабы аптекаларынан «киирбиттэрэ» ыраатта. Соторутааҕыта Сергей Миронов Дьокуускайга кэлэн пресс-конференция биэрэригэр, «Якутия» хаһыат суруналыыһа «дьаарай ньыгыл» Марина Колбасина, Мироновы «Тумууһап ойоҕун аптекаларын илиитин-атаҕын босхо ыытаары «эмп сокуонугар» уларытыы киллэрбитин билэҕин дуо?» диэн үрдүгэр түспүтэ. Онуоха Федот Семенович «кэргэним дьиэҕэ олорбута 8 сыл буолла, бииргэ төрөөбүт балтым аптекалардаах» диэн хардарбыта. «Хаан биир, хамнас туһунан» диэн өс хоһооно үөдүйбүтэ ыраатта. Улахан хамнастаах дьон баҕар бииргэлэһэллэрэ буолуо эрээри, тымтык туппут суох.
Тумууһап сакылаат буолбатах. Син биир итэҕэстээх-быһаҕастаах. Ааспыт сырыыга кини «атаҕастаммыт соҕотох саха» буолан элбэх куолаһы ылбыта. Бу сырыыга киирсэр дьоннор бары кэриэтэ сахалар, президеммит эмиэ саха. Онон урукку «туора көрүллүбүт киһи» оруолуттан Тумууһап политическай амплуата уларыйдаҕа эбээт. Хата төттөрүтүн олуона буруйдааһын түмүгэр, эмиэ «атаҕастаммыт» оҥорон куолаһын эбии элбэтээйэҕит? «Наркодилер» диэн сирэй-харах анньааһын аһара барыы, доҕоттор.
Туйаара НУТЧИНА.
Комментарии