Маннык баҕа санааны толорон, «Бичик» кыһа Ленин проспега, 9 №-дээх маҕаһыыныгар («Киэргэ» ювелирнай салон утары) ааспыт субуотаҕа талааннаах прозаик, ааптар Айталина Никифорова үһүс уус-уран кинигэтин сүрэхтэниитигэр ааҕааччылары кытта көрсүһүү буолан ааста. 

Болдьоммут бириэмэҕэ кыракый маҕаһыын иһэ тобус-толору дьонунан туолан, салгын кытта сылыйарга, итиинэн илгийэргэ дылы буолла. Биһиги олорон кэлбит олохпутугар буолан ааспыт чахчылар дьон дьыл±атыгар хайдах дьайбыттарын, хайа баҕарар кэмІэ киґи дьолу кірдіін оло±ун оІосторун,  үөрүүтүн-хомолтотун, устугас дьолу эккирэтэн, олоҕор сыыһа үктэнэн, албыны кууһарын, атаҕастабыл аһыы амтанын билэрин, дьолго умсаары бадарааҥҥа сөтүөлээбитин, сорох мунан-тэнэн баран сіптііх суолу талан кырдьыгы булбутун туһунан киинэ курдук ырылхайдык суруйар Айталина Никифорованы ааҕааччылар төгүрүччү туран, араас ыйытыктары биэрэн, истиҥ-иһирэх кэпсэтии таҕыста.

1986с. Саха университетын устудьуоннарын оло±ун биирдэ ытыйбыт хомуур охсуґуу кэнниттэн бµтµн омугу национализмІа буруйдаабыттарын,  ол сабыдыал эдэр дьон дьыл±атын алдьаппытын, сырдык, ыраас таптал буорга тэпсиллибитин туґунан аан бастаан Айталина Никифорова уус-уран айымньы суруйан «Сырдык курус» диэн кинигэни таһааттарбытын дьон бэркэ сэргээн иһиттилэр, ааптарга автограф туруоттаран, кинигэтин атыыластылар.

Бу аҕыйах хонуктааҕыта ааптар «Эргиллиэм мохсоҕол буолан» диэн олох хайа баҕарар түгэнигэр булгуруйбат күүстээх ис санаалаах кинигэтэ таҕыста.  Манна репрессия сиэртибэтин оҕолорун ыар дьылҕата, сирэй көрбөх буолуу, олох ханнык да батталыгар бэриммэт улахан таптал, кырдьык өрөгөйө, удьуор тыыннаах утума сытыытык кэпсэнэр.

Маны таһынан, хас биирдии киһи олоҕор дьолу көрдүүр, ол эрээри, дьол туһунан өйдөбүлэ тус-туһунан. Ким эрэ дьолум диэн сыыһа үктэнэн, албыны кууһар. Ким эрэ дьиҥ аналын булан дьоллонор. Бу ыйытыыларга хоруйу кинигэҕэ киирбит кэпсээннэр биэрэллэр.

Ааптары «Саха сирэ» хаһыакка бииргэ үлэлээбит биир идэлээхтэрэ, эмиэ айар куттаах, сытыы бөрүөлээх Галина Нельбисова, Намылы, Сардаана Кузьмина үөрүүтүн тэҥҥэ үллэстэн, эҕэрдэлэрин эттилэр. Номнуо биэс кинигэ ааптарын Айталина Никифорованы Саха сирин суруйааччыларын сойууһугар ылар кэм кэллэ диэтилэр. Суруйааччылар ааттарыттан эдэр ааптарга Василий Сивцев алгыһын анаата, инникитин элбэҕи эрэйэрин, дьон сүрэҕин долгутар өссө да саҥа айымньылары күүтэрин биллэрдэ.

1986с. устудьуоннаабыт көлүөнэ аатыттан биһирэбиллэрин биллэрэн, эдэр саастарын санаппыт «Сырдык курус» кинигэни сэргээн, ахсынньы тымныытын аахсыбакка ааптарга тыыннаах сибэкки дьөрбөтүн туттардылар.

Онон, сахалыы кинигэни сэргээччилэр, «Бичик» кыһа ааҕааччылара ааптары кытта көрсөн, викторинаҕа кыттан, бэлэх ылан, ирэ-хоро кэпсэтэн, астынан дьиэлэригэр тарҕастылар.

  ***

Марианна ТЫРТЫКОВА