"Син биир Москубалыах эрээри эмиэ тоҕо быыбарга кыттан Ил Түмэн депутатын мандатын былдьаспытай?" - диэн ыйытар дьоҥҥо быһаараллар: 
- Саҥа сокуон быһыытынан, сенатордар булгуччу депутат мандаттаах буолуохтаахтар. Ол иһин АКИМОВ Ил Түмэн депутатын быыбарыгар кыттан, СР Государственнай мунньаҕыттан Федерация Сүбэтигэр бэрэстэбиитэлинэн талылынна.
***
Александр АКИМОВ депутат быһыытынан боломуочуйатын Ил Түмэн иккис сессиятыгар уһулбуттара. Эһиил сунтаардар эмиэ быыбардыыр дьолго тигистилэр - Ил Түмэҥҥэ саҥа депутаты талыахтара.
Александр Константинович төһө да депутаттаан бүтэ охсон сенатордыы барбытын да үрдүнэн "төрөөбүт улууһун интэриэһин туруулаһар" баҕалааҕын тиэрдэллэр. АКИМОВ иннинэ ФС-гэр Александр МАТВЕЕВ Ил Түмэн бэрэстэбиитэлинэн сылдьыбыта.
АКИМОВ билиҥҥитэ түөрт кэмитиэккэ үлэлиир баҕалаах: федеративнай тутул, региональнай политика, олохтоох бэйэни салайыныы уонна Хоту сир дьыалаларыгар. ФС аныгыс мунньаҕар, алтынньы 30-гар,  сенаторбыт ханнык кэмитиэккэ үлэлиэҕэ быһаарыллыахтаах. 
***
Санатар эбит буоллахха, СР бэрэстэбиитэлэ Вячеслав ШТЫРОВ саҥа сокуон ирдииринэн балаҕан ыйыгар эмиэ быыбарга кыттан, Мииринэй улууһун Арыылаах нэһилиэгин депутаттарын мунньаҕар талыллыбыта. 
***
Аартык.ру