Тус эппиэттээх эрэдээктэр быһыытынан Ил Түмэн бэрэссэдээтэлэ Александр Жирков быһаччы үлэлэспитэ таһым үрдүгүн кэрэһэлиир. Бу ыйааһыннаах халыҥ антология 2011с. ХХIV Москватааҕы аан дойду кинигэ быыстапкатыгар аатырбыт К.С.Станиславскай уонна Вл.И.Немирович-Данченко аатынан музыкальнай театр сыанатыгар үрдүкү наҕарааданы ылбыта. «Сыл кинигэтэ» национальнай күрэх «HUMANITAS» түһүмэххэ кыайыылаҕынан биллэриллибитэ. Кыайыылаах статуэтканы муоранан тус хоту суолу арыйбыт Отто Юльевич Шмидт уола Сигурт Оттович туттарбыта.

Онтон Дальнай Восток эргимтэтигэр бу кинигэ «Бэчээт түһүлгэтэ-2012» Гран-при хаһаайына буолбута.    

Итинник баай историялаах «Саха театрын антологията» Сахабыт сиригэр 1906с. бастакы испэктээкил туруоҕуттан театр биһиги күммүтүгэр диэри хайдах сайдан кэлбитин кэпсиир. Манна биллиилээх артыыстар, режиссердар айар-тутар үлэлэрэ, олохторо, театр репертуара, Арассыыйаҕа, бүтүн аан дойдуга ситиһиитэ библиография быһыытынан сырдатылынна, архыып, музей сэдэх хаартыскалара, докумуоннара киирдилэр. 

Бу кинигэ – П.А. Ойуунускай аатынан Саха академическай театрын сиэркилэтэ, кэм кэрдии аастаҕын аайы тугунан да суураллыбат историята сааһыланан 3 томнаах антологияҕа тиһилиннэ.

«Саха театрын антологията» -- театральнай искусство сайдыытын киэн туттуута, барҕа баайа театрга сөбүлээн сылдьар дьоҥҥо дьоһун бэлэх эһигини «Бичик» маҕаһыыннарыгар күүтэр.

  ***

Марианна ТЫРТЫКОВА.