Москубатааҕы парадка эргилиннэххэ, 1941 сыллаахха уот сэрии иэдээннээх күннэригэр, Өктөөп өрөбөлүүссүйэтэ 24 сылын туолар күнэ-дьыла этэ. Саллааттар сүргэлэрин көтөҕөөрү, Москуба куорат өстөөхтөрүнэн төгүрүтүллэн турдаҕына санааны кынаттаары бу парад тэриллибитэ. Байыастар болуоссатынан хаамсан үргүччү сэриилэһэ барбыттара.
Бүгүҥҥү парадка оскуола оҕолоро,кадеттар оскуолаларын үөрэнээччилэрэ, ИДьМ үлэһиттэрэ, Москубатааҕы гарнизон саллааттара кыттыахтара. Барыта 5,6 тыһ. киһи кыттара былааннанар.
Бу парад уратыта диэн, ол саҕанааҕы хартыына толору хатыланыахтаах. Таҥастан-саптан саҕалаан, техникаҕа тиийэ 1941 сыллааҕы парады санатыахтаах. Халлааммыт кытары сэрии саҕанааҕы парадка курдук тэҥнэһэн биэрбит – 5-7 кыраадыс тымныы. 1941 сыллаахха сылаас халлаан турбута буоллар, ньиэмэс сөмөлүөттэрэ буомбалыы кэлиэхтэрэ эбитэ үһү. Онон, дойдубут санаатын бөҕөргөтөр тэрээһиҥҥэ халлаан кытары көмөлөспүт курдук буолан тахсар.