Быһаас Ньурбаҕа, атын да улуустар кытыы нэһилиэктэригэр "Билайн" суотабай сибээс кэлэн үөрүү-көтүү бөҕөтө, уруй улахана буолбуппут. Онтубут баара, харах баайыыта, кулгаах кулукута эрэ буолла. Сибээс олус куһаҕан. Куораты кытары кэпсэтиэхтээҕэр дэриэбинэ иһигэр да кыайан киһи кэпсэтэр кыаҕа суох. Атын улуус нэһилиэктэригэр "Билайн" эмиэ "социальнай эппиэтинэс" дии-дии сибээс киллэрбитэ буолбут да биһигиннээҕэр ордубатахтар. Син биир хаачыстыбата быстар мөлтөх. Дьон бөҕө бу суотабай оператор симкатын атыылаһан үллэҥнэппитэ, ыйга баһаам харчыны барыыбыт, онно өссө эбии төлөппүөн бөҕөтө ыалга ахсыыбытынан ылбыппытын эбэн кэбистэххэ - төгүрүччү орускуокка тэбилиннибит.
Бу хампаанньа Республика хааһынаттыттан кытыы нэһилиэктэргэ сибээс киллэрэбин диэн аатыран элбэх үбү тутан ылбыт дииллэр. Бэйэбит харчыбытыгар бэйэбитин албынната олороохтуубут. Тута сорунан баран тоҕо үчүгэйдик туппаттарый, киллэрэ сорунан баран тоҕо киһилии киллэрбэттэрий!
Интернет диэн тэриллэрэ эчи бытаанын, улахан туос иллэҥ киһи биирдэ тулуйан-тэһийэн киирэ сатыыр. "Электроннай правительство" маннык бытаан, сыаналаах интернеттээх региоҥҥа хайдах олоххо киириэҕин сатаан санаабаппын. Хайдах биһиэнэ наар аанньа буолан иһэрий?!
***
Баһылай Бөтүрүөп,
Ньурбаттан.