Саха бастакы букубаарын төрүттэспит Сэмэн Новгородов аатынан «Бичик» кинигэ кыһата ити көххө кыттыһан, быйыл Үс Хатыҥ үрэҕин бэтэрээ өртүгэр, кэккэлэһэ турар тимир көлөлөр, автобустар тохтобулларыттан уҥа диэки бэрт чугас саха балаҕанын, холумтанын уонна ыалдьыттары кытта сандалы тула олорон аһыыр сайыҥҥы күүлэ туттарда.
«Бичик» түһүлгэтин сүрэхтэниитин сиэрин-туомун алгысчыт ыытан, үрүҥ Айыыларга сүгүрүйэн, үрүҥ илгэни ыһан, арыылаах алаадьынан айах тутан, бар дьону кэрэхсэтэр кинигэ үтүмэнэ үрүйэ ыраас уутунуу субуллан тахсан истин, ситиһии сиэттистин, кыайыы кыттыстын диэн алгыһын анаата.
Юлиана хомуска оонньоон дьүрүһүтэн, Дьөһөгөй оҕото сүүрэн тобугуратарын, кистээн дьырылатарын, чыычаах ыллыырын субу баардыы үтүктэн, оҕо-аймаҕы сөхтөрдө.
Толору астаах сандалы тула олорон «Бичик» кыһа дириэктэрэ Август Егоров уйгу чороонун көтөхтөрдө, ыалдьыттарын саха төрүт аһынан күндүлээтэ. СР Бэчээт уонна телевидениенэн, радионан биэрии дьыалаларыгар департаменын салайааччы Филипп Пестряков, Амма улууһун баһылыга Александр Артемьев, ыраах Владивосток куораттан кэлбит бочуоттаах ыалдьыттар: Приморскай краеведческай библиотека дириэктэрин солбуйааччы, Дальнай Востокка «Бэчээт түһүлгэтин» тэрийээччи Наталья Кузьмина, «Дальпресс» дириэктэрэ Владимир Башкиров, маркетинг салайааччыта Наталья Борисова эҕэрдэлэрин эттилэр, баҕа санаа бастыҥын анаатылар.
Онон, «Бичик» кыһа Үс Хатыҥҥа эмиэ түһүлгэлэнэн, ааптардары, сакаасчыттары, айар куттаах дьону, ытык ыалдьыттары мунньан, саха сиэринэн ыһыаҕы өрө көтөҕүллүүлээхтик бэлиэтиир буолуоҕа.
***
Марианна Тыртыкова