“Ситим” бөлөх аатыттан иһитиннэрии хомуйар, бэйэтэ оҕолору көрдүүргэ волонтер этэрээтигэр киирэн көрдөһө сылдьар Лариса Анисимованы кытта кэпсэтэ сырыттыбыт. Лариса волонтердар этэрээттэрин биир улахан – 27 киһилээх – биригээдэтин салайан, иккис күнүн көрдөөһүҥҥэ үлэлии сылдьар. Лариса:

– Мин манна 13 киһилээх хамаандаҕа киирсэн кэлбитим. Арыыга аҕалан хаалларбыттарын мантан ылларбыттара. Кэлбит күммүтүгэр аһаан баран, тута дэриэбинэ аттынааҕы аппа сири (овраг) көрүүгэ ыыппыттара. Онтон тыаҕа тахсан сэлэлии хааман көрдөөбүппүт. Түүннэри көрдөөһүн барар. Бу билигин эмиэ бараары олоробут. Билигин көрдөөһүҥҥэ 70-ча волонтер, МЧСтар уонна олохтоох нэһилиэнньэ көмөлөһөр.

Сотору чааһынай бөртөлүөт кэлиэхтээх диэтилэр. Ким киэнин этэр кыаҕым суох. Истэ иликпин. Киэһэ Афанасий Максимов бөртөлүөтүнэн уматык аҕалыахтаахтар. Эмп-томп, батарыайа курдук көрдүүргэ туттуллар мал кэлиэхтээх. Волонтердар мээрийэ уонна биирдиилээн дьон көмө үптэринэн ылыллыбыт балааккаларга түһэн олоробут. Саҥа кэлээччилэр мин биригээдэбэр киирэллэр. Экстрасенстар да? Туох баар киирэр иһитиннэрии, ыйыллыбыт сир болҕомтото суох хаалбат. Хаттаан кытта баран көрөллөр. Экстрасенстар да арааһы этэллэр. Ол гынан баран сороҕо майгыннаһар курдук. Оҕолор этэҥҥэ көстүөхтэригэр эрэл уҕараабат. Биир көрбүөччү “оҕолору биир дьахтар киирэ-киирэ аһатан тахсар” диэн эппитигэр, хайдах эрэ олус итэҕэйиэххин баҕараҕын. Оҕолору көрдүүр штабы МЧС Саха сиринээҕи управлениетын салайааччыта Аркадий Саввинов салайар. ИДьМтан билигин миниистир солбуйааччыта Олег Лебедь баар.
***
Источник - Кыым.ру