Санатан эттэххэ, спартакиада Боотуруускай улуус тэриллибитэ 375 сылыгар ананан от ыйын 1-5 күннэригэр Чурапчы сэлиэнньэтигэр ыытыллар. Оонньуу спортивнай программатыгар хапсаҕай, мас тардыһыы, сахалыы ыстаныылар, ат сүүрдүү, оҕунан ытыы, буулдьанан ытыы, гиирэ спорда, чэпчэки атлетика уонна сахалыы многоборье киирдилэр.

Маны тэҥэ Чурапчытааҕы физическэй культура уонна спорт государственнай институтун базатыгар «Төрүт оонньуулары уонна норуот күрэхтэһиилэрин – физическэй культура уонна спорт сайдыытыгар туһаайыы» диэн Бүтүн Россиятааҕы научнай-практическай конференция тэриллэрэ былааннанар.

Спорт национальнай киинин пресс-бөлөҕө иһитиннэрбитинэн, «Манчаары оонньуулара» 19-с спартакиадаҕа барыта 3668 киһи кыттара күүтүллэр. Ол иһигэр спортсмена 1865, тренерэ 288, судьуйата 218. Спартакиада культурнай программатыгар 425 киһи кыттыахтаах. Маны тэҥэ сонуну киэҥник сырдатар средстволартан 120 киһи үлэлиэхтээх.

Оонньууларга кыттар спортсменнары, бочуоттаах ыалдьыттары түһэриигэ уонна аһатыыга барыта 31 обьект бэлэмнэнэн турар.

Бу кэрэ-бэлиэ түгэнинэн сибээстээн Чурапчыга Д.П.Коркин аатынан спортивнай оскуола саҥа үөрэтэр корпуһа, 3 тыһыынча миэстэлээх «Боотур Уус» стадион, элбэх функциялаах спортивнай комплекс, культура уонна сынньалаҥ пааркатыгар спортивнай площадка, Одьулууҥҥа «Моҕоллой сыһыыта» ипподром тутуллан үлэҕэ киирдилэр.

Быйылгы үбүлүөйдээх спартакиада саамай элбэх кыттааччылаах хамаандатынан Сунтаар улууһа буолар. Кинилэр Чурапчыга 111 спортсменынан кытталлар. Салгыы Уус-Алдан (106), Чурапчы уонна Мэҥэ-Хаҥалас (103-түү) кыттааччылаах буолуохтара. Хотугулуу-Илиҥҥи федеральнай университет, Жатай бөһүөлэгин уонна киин куораттарга үөрэнэр студеннар хамаандаларын ааҕан туран, быйылгы оонньууларга барыта 39 хамаанда спортсменнара күөн көрсүөхтэрэ.

Бүлүүгэ ыытыллан ааспыт 18-с оонньуулар түмүктэрин кылгастык билиһиннэрдэххэ, ити күрэхтэһиини дьүөрэлээн мас тардыһыыга Россия абсолютнай чемпионата, сахалыы ыстаныыларга Бүтүн Россиятааҕы турнир тэриллэн, оонньуу таһымын биллэрдик көтөхпүттэрэ. Барыта 88 комплект мэтээл оонньоммута. Кыайыылаахтарга алта массыына бириис уонна харчынан бириэмийэлэр туттарыллыбыттара. Спартакиада түмүгүнэн сахалыы ыстаныыларга Россия 8, Саха сирин 2 (сүүрүүгэ уонна оҕунан ытыыга) рекордара тупсарыллыбыттара. Хамаанданан түмүккэ киин улуустарга Дьокуускай бастакы, Чурапчы иккис, Мэҥэ-Хаҥалас үһүс миэстэлэргэ тахсыбыттара, оттон хотугу улуустарга үс бириистээх миэстэни туһааннааҕынан Орто Халыма, Кэбээйи уонна Дьааҥы хамаандалара үллэстибиттэрэ.

Бу сырыыга түмүк хайдах буоларын билэрбит аҕыйах хонук хаалла.
***

Петр ПАВЛОВ, "Саха сирэ" хаһыат.