"Үрдүк Айыылар, көмөлөһүҥ даа...

Сиинэҕэ түөрт хонуктааҕыта сүппүт кырачааннары көрдөөһүн салҕанар.

Дьокуускайтан Хаҥалас улууһун Сиинэтигэр эбээлэригэр сайылыы тиийбит икки оҕо сүппүтүн туһунан биһиги хаһыаппыт иһитиннэрэн турар. Бу быһылаан дьону олус аймаата, уйулҕатын хамсатта. «Тыыннаах эрэ буоллуннар даа!» диэн Үрдүк Айыылартан көрдөһөөччү күн-түүн элбээн иһэр.

Бу быһылааҥҥа сыһыаннаах быһыыны-майгыны хара маҥнайгыттан сырдаттахха маннык.

Дьиэлэрин тэлгэһэтигэр оонньуу сылдьыбыт үс саастаах Айаана Винокурова уонна Алина Иванова сүппүттэрин туһунан иһитиннэрии Хаҥалас полициятын дьуһуурунай чааһыгар бэс ыйын 25 күнэ үүнэр түүнүгэр, 01.00 чаас саҕана киирбит. Эбэлэрэ сиэннэрэ суохтарын киэһэ 20.00 чаас саҕана өйдөөн көрөн, бастаан бэйэтэ көрдүү сатаабыт, онтон дьэ нэһилиэк баһылыга Сергей Логиновка тыллаабыт. Тутатына олохтоохтор, сүүсчэкэ киһи буолан, оҕолору көрдөөһүнү саҕалаабыттар, көмөҕө полиция уонна РФ Ыксаллаах быһыыга-майгыга министерствотын Саха сиринээҕи управлениетын (РФ ЫБММ СР КУ) үлэһиттэрэ тиийбиттэр. Итиэннэ ити күн Сиинэҕэ СР ИДьМ-тын авиационнай этэрээтин бөртөлүөтэ, кинологтар тиийбиттэр.

Ити күн ураты суолталаах дьыалалары силиэстийэлиир отдел старшай силиэдэбэтэлэ салайааччылаах суһал-силиэстийэлиир бөлөх тэриллибит. РФ Силиэстийэлиир кэмитиэтин Саха сиринээҕи управлениета кыра оҕолор сүппүт чахчыларынан РФ Холуобунай кодексатын 105-с ыст. 2-с чааһын «а», «в» пууннарынан холуобунай дьыала тэрийбит. Ол эбэтэр, бэйэтин көмүскэнэр кыаҕа суох икки киһини өлөрүү бэлиэтэ баарынан.

Бу управление пресс-сулууспата иһитиннэрбитинэн, бэс ыйын 26 күнүгэр Сиинэҕэ суһал-силиэстийэлиир бөлөх үлэтин сүрүннүүр сыалтан Силиэстийэлиир управление салайааччыта Олег Мезрин тиийбит. Ити күҥҥэ 42 киһи ыйытыллыбыт, 17 киһи доппуруостаммыт, сүппүт оҕолор сылдьыбыт сирдэрин, нэһилиэк тутууларын, дьиэлэрин, чугастааҕы ойууру, Өлүөнэ уонна Сиинэ өрүстэр кытылларын кэрийэн, үөрэтии-чинчийии, бэрэбиэркэлээһин бара турар.

Силиэстийэ уорганнара хас да биэрсийэнэн үлэлииллэр. Дьыаланы силиэстийэлээһин хонтуруолга сылдьар. РФ СК ССУ холуобунай дьыаланы оҕолор өлбүттэринэн диэн буолбакка, оҕолору көрдөөһүҥҥэ кэккэ силиэстийэлиир дьайыылары оҥорор туһуттан тэрийбитин тоһоҕолоон бэлиэтиир. Полиция учуокка турар дьону барытын бэрэбиэркэлээбит.

Бэс ыйын 26 күнүгэр Дьокуускай куораттан сүүстэн тахса доброволецтар тиийбиттэр. Кинилэргэ полиция көх-нэм буолар, полиция начальнигын солбуйааччы Олег Лебедь кинилэр дьайыыларын сүрүннүүр. Сүппүт кырачааннары көрдөөһүҥҥэ эбии водолазтар, Быыһыыр сулууспа 20 үлэһитэ тиийбиттэр. ЫБММ психолога үлэлиир. Бөртөлүөтүнэн көрдөөһүн туох да түмүгү биэрбэтэх.

Бэҕэһээ, бэс ыйын 27 күнүгэр, Сиинэҕэ ис дьыала министрэ, полиция генерал-майора Виктор Кошелев тиийбит. Кини көрдөөһүҥҥэ кыттар полицейскайдар үлэлэрин сүрүннүүрүн туһунан пресс-сулууспата иһитиннэрдэ. Ону тэҥэ, ОМОН этэрээтин 15 байыаһа уонна ИДьМ эксперт-криминалистара тиийбиттэр.

СР Президенэ Егор Борисов кырачааннар сүппүттэрин олус чугастык ылынан, оҕолор төрөппүттэригэр эрэллэрин сүтэрбэттэригэр баҕарда, көрдөөһүҥҥэ кыттар дьоҥҥо махтанарын биллэрдэ уонна бу дьыаланы хонтуруолга ылла.

Биһиги бэс ыйын 27 күнүгэр, сарсыарда 09.00 чааска, РФ ЫБММ СР КУ начальнигын солбуйааччы, оҕолору көрдөөһүнүнэн дьарыктанар оперативнай штаб салайааччыта Аркадий Саввиновы кытта сибээстэһэ сырыттыбыт:

— Аркадий Филиппович, бүгүҥҥү күннээҕи туругунан быһыы-майгы хайдаҕын билиһиннэриэҥ дуо?

— Көрдөөһүн үлэтэ салҕанан бара турар. Бүтүн нэһилиэк дьоно бары турунан, түүннэри-күнүстэри көрдүүбүт. Бу эбии волонтердар кэллилэр, билигин олохтоохтору кытта холбоһон, көрдүү барыахтара. Булгунньахтаахтан, Еланкаттан эрийэн, көмөҕө кэлиэхтэрин баҕаралларын биллэрдилэр. Үс суукка иһигэр көрдүүр иэммитин 10 км диэри кэҥэттибит да, туох да сибики суох. Водолазтар түүнү быһа үлэлээтилэр. Өссө Сиинэ өрүһү, оҕолор сөтүөлүүр сирдэрин көрүөхтэрэ.

— Көрбүөччүлэри көмө­лө­һүн­­нэрдигит дуо?

— Москваттан тиийэ эрийбиттэрэ, көрбүөччүлэр эппит сирдэринэн үлэлээтибит да, мэлигир. Туох баар олорор дьиэлэри бэһис төгүлүн хат-хат көрдүбүт. Хас муннугу, хас сэппэрээги барытын көрдүбүт.

— Дьыала тэриллэн, бөһүөлэккэ дьону киллэрэллэр эрэ, таһаарбаттар, ыыппаттар дииллэр, буруйдаах куотуо диэн. Ити кырдьык дуо?

— Ити сыыһа иһитиннэрии. СУ салайааччыта Мезрин бэҕэһээ кэлэн барбыта. Түөрт силиэдэбэтэл үлэлии сылдьар. Көмөҕө кэлбит дьонтон биир да киһи «куоракка барабыт» диэбэт. Ким баҕалаах барыан сөп, кэлэргэ-барарга хаарчахтааһын суох.

— Аркадий Филиппович, «Саха сирэ» хаһыат бу иэдээннээх быһылааны тиһэҕэр диэри кэтээн көрөн сырдатыаҕа, ол иһин өссө да эрийиэхпит, билсиэхпит.

— Ээ, оннук бөҕө буоллаҕа, эрийээриҥ".
***
Аартык.ру: Эрэл бүтэһик эстэр. Эрэнэбит...