10 тыһ. солкуобай ыстараап хас да төгүл улаатыннаран мөлүйүөн аҥаарыгар диэри сыаналаммыта. Сокуоннайа суох мас кэрдиини силиэстийэлиир Ленскэйдээҕи Ис дьыала уорганын сотрудниктара дьэҥдьиир оҥорон "үлэ хаамыытын атахтаатылар" диэн "Транснефть" ААО салалтата улаханнык кыйахаммыта.
Бу дьыала тахсыбыт төрүөтүн араас дьон атын-атыннык быһаарда. Ким эрэ "олохтоох быраабы араҥаччылыыр уоргаттар тус интэриэстэриттэн сылтаан тэрилтэни ыктылар-түүрдүлэр" диэтэ, ким эрэ "Транснефть" социальнай эппиэтинэһиттэн ааккаастанаары "бэйэтэ соруйан дьэҥдьиир ыыттарбыт буолуон сөп" диэн сылыктаата.
Дьыала силиэстийэлэнэрэ уһаабытыттан-кэҥээбититтэн көрдөххө, хара маҥнайгыттан олус судургу дьыала буолбатах быһыылаах. Дьокуускай куорат Думатын дьокутаата Александр ДАНИЛОВ маныаха санаата:

«Транснефть» Россия киэн туттар тэрилтэтэ, аан дойдуга саамай улахан турба ситимин баһылыыр компаниянан биллэр.  

Дьэ, итинник корпорация үлэһитэ Демин суоһурҕаан саҥарара истэргэ сүөргү…

Бюджет үлэһиттэрин хамнаһа – былыргы Рим саҕаттан  быыбар кэмигэр суостаах кымньыы буолар. Хайа да салайааччы, хамнаһы кыччатар туһунан санаабат даҕаны. Ону ити билэн туран, балтараа миллиард курдук үбү Саха Сирин бюджетыттан «Транснефть» былдьаан ыллаҕына, социальнай долгуйуу, айдаан тахсар. Учууталлар хамнастарын бу сыл бүтэһигэр диэри федеральнай нуормаҕа тиэрдиҥ диэн, Россия президенэ В.Путин ирдэбилэ туолара эмиэ саарбах буолар. Итини барытын сылыктаан, ыраҥалатан көрдөххө, хайдах эрэ транснациональнай корпорациялар ханнык эмэ Африкаҕа дуу, Латинскай Америкаҕа дуу «банановай республикарга» туттар ньымаларын санатар.

Республиканы утары, кини интэриэһин көмүскүүр Аҕа Баһылык утары үлэ саҕаламмытын курдук балаһыанньа үөскээтэ. «Транснефть» корпорация, баҕар, республикаҕа хайдах олоруохтаахпытын, ким биһигини салайыахтааҕын туспа санаалаах-көрүүлээх дьон буолуо. Ол иһин итинник, үтэн-анньан, боруобалаан көрдөхтөрө.
Бу соторутааҕыта «Сомоҕолоһуу» бөлөх Республика президенэ Борисовтыын көрсүбүттэрэ. Мин санаабар, дьэ кэм кэллэ – сомоҕолоһобут дуу, суох дуу. Мантан ыла көстөн иһиэ – ким оҕолорбутугар-сиэннэрбитигэр кыра да буоллар баай-дуол хаалларар санаалааҕа, ким араас «ньиэптэртэн» харчы «тук» гыннаран баран, барытын тура биэрэ сатаан айдаан таһаарара.

Оттон мин санаам биир – баайбытын босхо туран биэрэр олох табыллыбат. Шантажка киирэн биэрбэккэ, суут-сокуон өттүнэн көмүскэниэххэ наада.
***
Прокопий ФЕДОРОВ,
Аартык.ру