Эллэй Боотур олохтообут төрүт үгэһинэн, Саха омук дэлэй ыһыаҕы төрүттүүр үтүө күнэ үүммүтүнэн Уруй-Туску, Айхал-Мичил!
Ыһыах сай бараан төрүт тыына саха омук кылыһахтаах ырыатыгар-тойугар, оһуор-бичик тыллаах, оҥкуллаах-отуордаах оһуохайыгар, омуннаах-төлөннөөх олоҥхотугар, хомуһуннаах хоҥкунас тыастаах, холобура суох хоһоонноох хомуһугар олохсуйар.

Саха киһитэ баай-талым эйгэлээх, анаарар-арчылыыр сүдү күүстээх, эйэҕэс-сайаҕас майгылаах, тулуурдаах-дьулуурдаах киэҥ көҕүстээх буолан, бу дьалхааннаах уонна тэтимнээх сайдыылаах XXI үйэҕэ биһиги, урааҥхай удьуордара, атын омуктартан итэҕэһэ суох сайдабыт, араас саҥа ньымалары төрүт ийэ өйбүтүнэн тобулабыт, баһылыыбыт, аан дойду сайдыытыгар кыттыһабыт.

Дьөһөгөй Айыы кэмэ кэлбитинэн,   бар дьоммор сырдык, ыраас кэскиллээх кэхтибэт санаалары, тулахадыйбат отуордаах иллээх-эйэлээх , нус-хас, баай-талым олоҕу, умуллубат уонна умнуллубат тэтимнээх кыайыыны-хотууну, саҥаттан-саҥа кэрэхсэнэр, холобур буолар ситиһиилэри баҕарабын!

Уйгуну-быйаҥы түстүүр, кэскили, кэрэни үксэтэр анал күммүтүгэр -  сахам мааны дьонугар Үрдүк мэҥэ халлааҥҥа олохтоох аҕыс ахтар Айыыһыттарбыт, сэттэ иэйэр Иэйиэхситтэрбит алгыстара  арчылыы, араҥаччылыы турдун диэн Саха Сирин Оһуохай Түмсүүтүн чулуу дьоннорун ааттарыттан аман өспүн тиэрдэбин!

 ДОМ!

 
«ОҺУОХАЙ ТҮМСҮҮ» салайааччыта Александр Джурович ДАНИЛОВ.