Дьокуускай куорат хаһаайыстыбатын үлэлэтэр сулууспа (СЭГХ) салайааччытын солбуйааччыта Юрий БУСКАРОВ этэринэн, суол быраабылатын бэлиэтин көрөр-истэр аналлаах "Сигнал" ААО эчэйбит оҕо аймахтарын кытары эйэ-дэмнээхтик быһаарсан кэпсэтэ сылдьар.
- СЭГХ бэйэтиттэн эппиэтинэһи халбарыппат, "Сигнал" эмиэ. Онон оҕо эми-тому  барарыгар көмөлөһүөхпүт, - диир Юрий Харлампьевич. - Бэлиэ ГОСТ ирдэбилинэн оҥоһуллан турар диэн ШУЛЬГИН этэр. Бэлиэ саарбах туруктааҕын туһунан ким да инники биллэрбэтэх. Бетонунан кутуллан оҥоһуллубут олбохтоох бэлиэ хайдах сууллан түспүтүн сатаан санаабаппыт. ШУЛЬГИН ол күн күүстээх тыал түһэ сылдьыбыта диир. Баҕар тыалтан сууллубута буолуо, баҕар ким эрэ иҥнэри аспыта буолуо... Ити бэлиэ алта сыл турбут.  
Оттон оҕо тастыҥ эдьийэ Саргылаана ЖИРКОВА этэринэн, "Сигнал" ААО салалтатын кытары кырдьык кэпсэтии тахсыбыт. Кыысчаан тулаайах эбит, онон эмкэ-томко көмө наадыйара биллэр. 
Суол бэлиэлэрин кэмиттэн-кэмигэр көрөр-истэр наада. "Ким да үҥсэ илик"  диэн түбэлтэттэн түбэлтэҕэ эрэ хамсанар сыыһа буоллаҕа. Алта сыл тухары хаарга-самыырга таас элэйэрэ сэрэйиллэр, уонна итиннэ элбэх массыына турар, баҕар кинилэр да сыҕарыппыт буолуохтарын сөп.
***
Аартык.ру