Холуобунай дьыала өссө тэриллэ илигинэ, быһылаан биэрсийэлэрин ырытыһыы бөҕө буолбута. Бастакытынан, чааһынай предприниматель үлэһиттэрэ иэстэспит буолуохтарын сөп диэн. Харчыларын төлөөбөккө, отоойкоҕо олордуталыыр идэлээҕин иһин. Иккиһинэн, браконьердааһын. «Тротилы туттан балыктааһын – биллэр суол» диэн сабаҕалаабыттара сорохтор. Үсүһүнэн, «криминальнай аптарытыаттар» иэстэспиттэрэ буолуо диэн. Предприниматель хаайыылаахтар «общактарыгар» харчы төлүүртэн аккаастаммытын иһин диэн. Өссө төгүл санатабын – бу интернеккэ дэлби тэбиини ырытыспыт дьон санаата.

Оттон силиэстийэ уорганнара ити чахчынан РФ Холуобунай кодексатын икки ыстатыйатынан холуобунай дьыала тэрийбиттэрэ – «уопсастыбаҕа кутталлаах ньыманан икки киһини соруйан өлөрүү» уонна «дэлби тэбэр тэриллэри сокуоннайа суохтук илдьэ сылдьыы, харайыы». Кэккэ экспертизалар анаммыттара.

Бэҕэһээ өссө биир сонун тилийэ көттө – дэлби тэбиигэ сыһыаннаах уорбаланааччы тутулунна диэн. Ол туһунан СР ИДьМ-тын уонна РФ Силиэстийэлиир кэмитиэтин Саха сиринээҕи управлениетын пресс-сулууспалара иһитиннэрдилэр. Оперативниктар буруйдаах кимин, ханна баар буолуон сөбүн көрдүүр тэрээһиннэрин кэмигэр Булгунньахтаах уонна чугас сытар нэһилиэктэр олохтоохторуттан ыйыталаспыттар. Ити көрдөөһүҥҥэ республика полицейскайдара эрэ буолбакка, Россия ИДьМ-тын холуобунай ирдэбилин кылаабынай управлениетын оперативниктара эмиэ кыттыбыттар.

Түмүгэр, уорбаланааччыны – Мохсоҕоллоох сэлиэнньэтин 50 саастаах олохтооҕун – дьиэтиттэн булан туппуттар. Уорбаланааччы быһаарбытынан, кини ити буруйу иэстэһэн оҥорбут – предпринимателлиин урут улаханнык кыыһырса сылдьыбыттарын умнубатах. Дэлби тэбэр сэби-сэбиргэли бэйэтин гарааһыгар оҥостубут. Билигин бу «террориһы» силиэстийэ кэмигэр Силиэстийэлиир изоляторга хаайар туһунан боппуруос көрүллэр.
***

Вера МАКАРОВА,
"Саха сирэ".