Быыстапканы тэрийээччилэр ааттарыттан СР Эргиэн-промышленнай палататын президенэ Владимир Членов, СР доруобуйа харыстабылын министрэ Александр Горохов, СР үлэ уонна социальнай сайдыы министрин солбуйааччы Виктор Колесов тэрээһин кыттыылаахтарын эҕэрдэлээтилэр.

            Медицина балысханнык сайдыбытын Россия 10 регионуттан кэлэн кыттыбыт 30-тан тахса компания кыттан туоһулаата. Ол курдук, Новосибирскай, Иркутскай, Москва, Тула, Екатеринбург, Хабаровскай, Томскай, Брянскай, Санкт-Петербург уонна Дьокуускай  куораттартан аныгы медтехника арааһа быыстапкаҕа турда. Быыстапкаҕа көрө-истэ эрэ буолбакка, көрдөрүнүөн баҕалаах кытта эмчит босхо консультациятын ылар кыахтанна. Ол курдук, дерматолог, фтизиатр, нарколог, психолог, маммолог курдук быраастарга уочарат тоҕуоруста, ким хаан аналиһын туттарыан, УЗИ, флюорография өҥөтүнэн туһаныан баҕалаах дьон санаатын бу күн ситтэ.

            Инбэлииттэргэ аналлаах араас медтехника арааһа көрдөрүлүннэ, тустаах специалистар кинилэргэ консультация эмиэ биэрдилэр. Юрий Степанов салайааччылаах "СР инбэлииттэрин доруобуйатын кэлимник тупсарар социальнай чэбдигирдэр киин" Германия "ОТТО БОКК" протезтарын көрдөрдө.

            Матрена Петухова салайар "Эмтиир физкультура уонна спортивнай медицина  республикатааҕы киинэ" эмиэ үгүс киһи болҕомтотун тарта. Дьон ордук "Эллэй Боотур" Муус дыбарыаһыгар нэдиэлэҕэ үстэ 50-тан үөһээ саастаах дьоҥҥо "Доруобуйа бөлөҕө" үлэлиирин интэриэһиргээтэ. Матрена Николаевна бэлиэтииринэн, манна 90-гар чугаһаабыт дьон кытта сылдьаллар эбит! Физиотерапия, лазерынан эмтээһин, электрофорез, магнитотерапия курдук физиотерапия эмтиир көрүҥнэрин  өҥөтүнэн эмиэ бу кииҥҥэ сылдьан туһаныахха сөп. Ону тэҥэ хондуруостаах, сколиозтаах, плоскостопиелаах, оһолтон эмтэнэ сылдьар дьоҥҥо анаан эмтиир физкультура ыытыллар эбит. Саамай киһи кэрэхсиирэ  -- бу өҥө барыта босхо оҥоһуллар! Сыччах аттыбытыгар маннык наадаалаах киин баарын билбэппититтэн сөхтүм.  Дьон-сэргэ доруобуйатын туһугар ис дууһатыттан кыһаллар соҕотох тэрилтэ бу эбит диэтэхпинэ да, бука, алҕаһаабатым буолуо. -- Айылҕа киһини сүһүөҕүнэн кырытыннарар эбит, -- диэн бэлиэтиир Матрена Николаевна уонна интэриэһиргиир дьоҥҥо кылгас маастар-кылаас ыытта. Маннык эмтиир массажтары хайдах оҥорор туһунан Матрена Петухованы тэрилтэлэргэ да ыҥыран киһи сүбэлэттэриэн сөп эбит.

            Ити курдук «МедЭкспо» анал быыстапката төрдүс төгүлүн ыытыллар буолан, дьон-сэргэ наадалааҕын чуо буларын ааһан, үгүс сонун сүүрээни, саҥаны билэн-көрөн тарҕаста.

  ***