Ити бириигэбэри СР Үрдүкү суутугар ааһынаммыт, Үрдүкү суут 2012 сыл ахсынньы 23 күнүгэр дьыаланы хаттаан, суут саҥа састаабынан көрөрүгэр уураах таһаарбыта. Онон, быйыл олунньу ыйга Бүлүү оройуоннааҕы федеральнай суутугар дьыалабыт үһүстээн көрүллүбүтэ. Суукка туоһулар бары кэлэн, туох буолбутун дьиҥнээхтик көрдөрүү биэрэннэр, оҕом туохтан, тоҕо буруйу оҥорбута дакаастанан, суут үс сылга усулуобунай миэрэни анаабыта уонна эмсэҕэлээччи Крыловка 150 тыһ.солк. төлүүргэ уураахтаабыта (судьуйа Н.С.Мартынов, прокурор көмөлөһөөччүтэ Л.Ю.Докторова).

Бу бириигэбэри эмсэҕэлээччи Крылов уонна кини адвоката А.И.Прокопьев СР Үрдүкү суутугар ааһынаннар, дьыалабыт кулун тутар 19 күнүгэр көрүллэн, дьэ, быһаарыллыбыта. Үрдүкү суут бириигэбэри оннунан хаалларбыта. Оо, киһи эрэ үөрүөх, киһи эрэ ытыах курдук! Дьыалабыт сылы быһа быһаарыллыар диэри биһиги аймахтар төһөлөөх санааҕа ылларбыппыт, уолбут туһугар төһөлөөх ыалдьыбыппыт буолуой! Күнүс олорбокко, түүн утуйбакка, күннээх халлаантан төһөлөөх көрдөспүппүт-ааттаспыппыт буолуой!

Дьыалабытыгар саамай сүүрбүт-көппүт киһинэн республика биир күүстээх, уопуттаах адвоката Прокопий Васильевич Павлов буолар. Бу кэмнэр тухары дьыаланы хасыһан, үөрэтэн, ырытан, сүүрэн-көтөн аҕай биэрдэ. Киниэхэ биһиги дьиэ-кэргэн аатыттан улахан махталбытын тиэрдэбит. Дьолу-соргуну, үлэтигэр өссө үрдүк ситиһиилэри, кыһалҕалаах дьоҥҥо бу курдук көмөлөһө-көмүскүү турарыгар баҕарабыт.

Муҥура суох махталбытын тиэрдэбит, биһиги кыһалҕабытын кэмигэр өйдөөн, өйөөн, ылынан, дьон-сэргэ киэҥ билиитигэр таһаарбыт «Саха сирэ» хаһыакка уонна чуолаан, бу тиэмэҕэ дьаныардаахтык суруйар суруналыыс Вера Макароваҕа. Бу хаһыаттан биһиги дьыалабытын олус элбэх киһи ааҕан, биһиги туспутугар ыалдьан, баҕа санааларын этэн, улахан өйөбүл ыллыбыт. Биһиэхэ үтүөнү баҕарбыт, көмөлөспүт-өйөөбүт дьоҥҥо барыгытыгар дириҥник махтанабыт, эһиэхэ дьол эрэ тосхойдун, барыты этэҥҥэ буолуохтун!  

Сардаана Волкова,
уол ийэтэ.