Быйылгыттан ыла бу Саха сирин брендинэн буолбут Чысхаан хайа хаспаҕар баар дьиэтэ Өймөкөөн аатырбыт суруйааччыта, литературнай критик Николай Заболоцкай-Чысхаан аатынан Томтордооҕу кыраайы үөрэтэр музей бас билиитигэр киирбит. Инньэ гынан музей директора Розалия Дягилева фестиваль бэлэмигэр сылдьан, ый курдук мас күрдьэҕин туппутунан бу хаспахтан арахпата. Дьэ бу маннык бэйэ дьыалатыгар бэриниилээх буолуохха наада – Розалия Тимофеевна үлэтэ фестиваль биир бастыҥ “фишкатынан” буолла!

1984-1985 сылларга сайыҥҥы кэмҥэ эт аһы харайар хаспах оҥостоору Өймөкөөннөөҕү атыы-эргиэн отделениетын салалтата “штольня” хастарарыгар 21-с үйэҕэ бу манна “Чысхаан резиденцията” диэн ааттаах Саха сирин ааттатар кыһыҥҥы туризм фестивалын биир баар суох атрибута буолуо диэн түүлүгэр да түһээбэтэҕэ чахчы. Розалия Тимофеевна кэпсииринэн, бу манна хас фестиваль аайы муус оҥоһуктары оҥорон эбэн испиттэр эбит эрээри, кэлиҥҥи икки сылга үчүгэйдик көрөр-истэр киһи суоҕуттан, муус оҥоһуктар сайынын көрүллүбэккэ-харайыллыбакка ирэр аакка барбыттар. Кыраайы үөрэтэр музей директора бэйэтин үлэһиттэрин кытта муус оҥоһуктары хараһыйан, бэйэтин тус баҕатынан бу икки сыл устата күһүн аһан, саас сабан харайа сылдьыбыттар. 2012 сыллаахха улуус баһылыга Василий Местниковтан фестиваль киэргэлин таах хаалларбат туһуттан көрдөспүттэригэр, музейга биэрэр гына анал дьаһал таһааран, “штольня”, ол эбэтэр “Чысхаан дьиэтэ” (резиденция)  дьэ тустаах хаһаайынын булбут.

2011 сыллаах фестивальга үс хос саҥардыллыбыт. Быйыл араас темаҕа 8 композициялаах 5 хос толору оҥоһуллубут. Ол курдук Санта Клаус уонна Чысхаан тус биирдиилэригэр анал хостору, “Байанай”, “Лабыҥкыр”, “Ойуун уһуктуута” курдук сүүнэ муус оҥоһуктары скульптор Александр Шадрин оҥорбут. Бу муус скульптуралары оҥорууга анаан күһүн Буор Үрэхтэн 25 тыһ. мууһу хостоон тиэйбиттэр. Оттон скульптура аайы сыһыарыллыбыт электричество уотун-күүһүн “Сахаэнерго” Томтордооҕу филиалын салалтата туруорбут. Ыалдьыттар “Чысхаан дьиэтин” интиэриһэргээн бу күн хото сылдьыбыттар. Онон сыаналарын ыараппатах музей үлэһиттэрэ үс чаас иһигэр киирии билеттэн 25 тыһ. солк. киллэрбиттэр.

Ити курдук Розалия Дягилева эрэллээх илиитигэр түбэспит, саҥа тыыннаммыт уонна баай ис хоһоонноммут "Чысхаан резиденцията" сотору кэминэн Ньукулай Заболоцкай -- Чысхаан аатынан кыраайы үөрэтэр музей  көмөтүнэн Финляндияҕа олорор Санта Клаус резиденциятын курдук ааттанан-суолланан тахсарыгар эрэнэбит.