СР Правительствотын Бэрэссэдээтэлин солбуйааччы Александр Борисов быыстапка кыттыылаахтарын эҕэрдэлиир тылыгар кини бэйэтэ эмиэ көннөрү турист быһыытынан бу тэрээһиҥҥэ интэриэстээҕин уонна Саха сирин кэрэ айылҕата туристары угуйар ураты күүстээҕин бэлиэтээтэ.

            СР Предпринимательствоҕа уонна туризмы сайыннарыыга министрэ Екатерина Кормилицына «Sakha-Travel -- 2013» быыстапка-дьаарбаҥка Тыа сирин сылынан биллэриллибитинэн сибээстээн, "Ыалдьытымсах тыа сирэ" диэн ааттаах-суоллаах ыытыллан эрэрин, сүрүн болҕомто улуустар нэһилиэктэригэр туризмы сайыннарыыга болҕомто уурулларын тоһоҕолоон эттэ.

            -- Бүгүҥҥү тэрээһиҥҥэ 17 улуустан номнуо ааттаах-суоллаах, туспа суоллаах-иистээх, дириҥ ис хоһоонноох үлэлээх туристическай тэрилтэлэр кыттыыны ылаллар. Сорох нэһилиэктэр иккилии-үстүү маршруту үлэлэтэн эрэллэр. Бу -- туризм сайдыытын туоһута, -- диэн бэлиэтээтэ министр.

            Омук сирдэриттэн Чехияттан уопут атастаһа кэлбит буоллахтарына, кытайдар нэһилиэктэри кытта быыстапкаҕа ыга анньан турбуттара -- сонун көстүү. Сахалар буоллахтара диэн ыйыппыппытыгар, дьоммут кытайдыы хардаран соһуттулар -- кытай тылыттан тылбаастаммыт визиткалара, буклеттара баһаам. Ол да иһин Даляньтан "Хикари" турфирма ыҥырыытынан анаан бу быыстапкаҕа кытта кэлбит Ген Ли ("нууччалыы аатым Люся" диир): "Далянь -- сахалар иккис дойдулара. Мин эмиэ Саха сиригэр дойдубар сылдьар курдук сананным. Ол, арааһа, тас көрүҥмүт биириттэн, дойдуларбыт айылҕалара да кэрэтиттэн буолуо", -- диэн санаатын үллэһиннэ.

            "Дохсун" спорткомплекска ыҥырыа уйатын тоҕо тарпыт курдук элбэх туризмҥа үлэлэһэр тэрилтэ муһунна. Икки күн устата тыа сирин олохтоохторо бэйэ-бэйэлэрин кытта ыкса билсиэхтэрэ, ирэ-хоро кэпсэтиэхтэрэ, араас семинардарга кыттыахтара.