Онно республика ГИБДД-тын начальнига, полиция полковнига Самсон Чупров түбэспит түбэлтэтин туһунан суруллубута. Кылгастык санатар буоллахха, кини тохтоппут массыынатыттан тахсыбыт холуочук уолаттартан биирдэстэрэ видеокамераҕа уста сылдьан, докумуонун көрдөрөрүгэр модьуйан, начальнигы моонньуттан ылан, этин-сиинин көҕөрдүбүт чахчытынан РФ Холуобунай кодексатын 318-с ыст. 1 чааһынан дьыала тэриллибитэ. Ол эбэтэр, былаас бэрэстэбиитэлигэр күүһү туттан, олоххо уонна доруобуйаҕа куттала суох эмсэҕэлээһини оҥоруу бэлиэтэ баарынан.
Нэдиэлэ ааһаатын, ити түбэлтэ сүрүн «дьоруойа» редакцияҕа илэ бэйэтинэн тиийэн кэлэн, бырастыы гыннарар суругун хаһыакка бэчээттиирбитигэр көрдөстө. Нууччалыыттан тылбаастаан, сурук ис хоһоонун тиэрдэбин:
«Мин, Борис Х., ити түбэлтэ быһаччы кыттыылааҕа, сонуннары киэҥник тарҕатар ситимнэр нөҥүө СР ИДьМ-тын ГИБДД управлениетын начальнига, полиция полковнига С.В.Чупровтан бырастыы гынарыгар көрдөһөбүн. Мин сыыһа быһыыланаммын, кулун тутар 2 күнүгэр ити бөрүкүтэ суох түбэлтэ таҕыстаҕа. С.В.Чупров ити түбэлтэҕэ орооһон, сөпкө гыммыт. Кини орооһон, биһиги өссө ыарахан содулга тиийиэхтээхпитин сэрэттэҕэ.
Буруйбун толору билинэбин, кэмсинэбин уонна бары гражданнары общественнай бэрээдэги кэспэттэригэр, полиция үлэһиттэригэр убаастабыллаахтык сыһыаннаһалларыгар уонна кинилэр сокуоннай ирдэбиллэрин толороллоругар ыҥырабын».
Бу бэрт оттомноох сирэйдээх-харахтаах эдэр киһини көрөммүн, саныыбын ээ, – төһөлөөх элбэх үчүгэй саха ыччата арыгы иһэн баран, оҥоруо да суохтааҕын оҥорбута, түбэһиэ да суохтааҕар түбэспитэ буолуой диэн. Арыгы истэллэр эрэ, халлаан хабарҕаларынан, муора тобуктарынан буола түһэр буолаахтаатаҕа. Эдэр саас маннык быстах алҕаһыттан олох хараҥа дьэбэрэтигэр тимирэр дөбөҥ буоллаҕа эбээт.
Бу Борис Х. диэн эдэр киһи оҥорбут сыыһатын кэмигэр өйдөөн, ГИБДД начальнига Самсон Чупровка бэйэтигэр тиийэн, бырастыы гыннарбыта – эр киһилии да, сөптөөх да быһыы.
Вера МАКАРОВА, "Саха сирэ".